Ադրբեջանական APA գործակալության մոսկովյան թղթակիցը, հղում անելով Ռուսաստանի Դաշնության ԱԳՆ մամուլի եւ տեղեկատվության դեպարտամենտին, երեկ տարածել է հաղորդագրություն, ըստ որի, «ի պատասխան ադրբեջանական կողմի հարցման», ՌԴ արտաքին քաղաքական գերատեսչությունից Գյումրիի 102-րդ ռուսաստանյան ռազմահենակայանի հրամանատար գնդապետ Ռուզինսկու ` «Կրասնայա զվեզդա» թերթին տված հարցազրույցում արտահայտած մտքերի կապակցությամբ «ստացվել է պատասխան»:
Ըստ այդմ, «Ռուսաստանը հավատարիմ է մնում ղարաբաղյան հակամարտության խաղաղ կարգավորման սկզբունքին: Ղարաբաղյան հարցի կարգավորման վերաբերյալ Մոսկվայի դիրքորոշումը չի փոխվել, եւ դա սկզբունքային դիրքորոշում է: Այդ դիրքորոշումը բազմիցս արտահայտվել է Ռուսաստանի ԱԳՆ ղեկավարության եւ ԵԱՀԿ Մինսկի խմբի համանախագահների հայտարարություններում: Հարկ է հիշեցնել նաեւ Ռուսաստանի, ԱՄՆ-ի եւ Ֆրանսիայի նախագահների` այս տարվա հունիսին Լոխ-Էրնում ընդունած հայտարարության մասին: Հայտարարության մեջ ասված է, որ պատերազմական գործողությունների վերսկսումը տարածաշրջանի բնակչության համար կարող է ունենալ աղետալի հետեւանքներ»:
Ադրբեջանական կողմը սույն «պաշտոնական հայտարարությունը» բնութագրել է որպես Ռուսաստանի Դաշնության ԱԳՆ կողմից «գնդապետ Ռուզինսկու խոսքերից հրաժարում»: Թեեւ պարզ չէ, թե ՌԴ ԱԳՆ մամուլի եւ տեղեկատվության դեպարտամենտից «ստացված պատասխանում» որտե՞ղ է ասված, թե Լեռնային Ղարաբաղի դեմ Ադրբեջանի կողմից նոր պատերազմի սանձազերծման դեպքում Գյումրիի ռուսաստանյան ռազմակայանը «չի միջամտի»:
Այդուհանդերձ, APA-ն մեջբերել է նաեւ երկրորդ` հոկտեմբերի 31-ին Գյուլիստանի պայմանագրի 200-ամյակին նվիրված` Մոսկվայում կայացած գիտաժողովին վերաբերող հարցադրման «պաշտոնական պատասխանը»: Ադրբեջանական լրատվամիջոցի փոխանցմամբ, ՌԴ ԱԳՆ-ն պարզաբանել է, որ «այդ միջոցառումը կազմակերպվել է ԱՊՀ երկրների ինստիտուտի եւ Ռուսաստանի հայերի միության կողմից, իսկ դրանք ոչ կառավարական, հասարակական կառույցներ են»:
Ինչ վերաբերում է գիտաժողովի ընթացքում հնչած մտքերին, ապա «դրանք հանդիսանում են սուբյեկտիվ», ՌԴ ԱԳՆ-ն «դրանք չի կիսում, գիտաժողովի ընթացքում ասվածը (ռուսաստանյան կողմից) չի հանդիսանում պաշտոնական դիրքորոշում»:
Շատ հնարավոր է, ադրբեջանական լրատվամիջոցը սեփական մեկնաբանությունը ներկայացրել է որպես ՌԴ ԱԳՆ մամուլի եւ տեղեկատվության դեպարտամենտի «պաշտոնական տեսակետ»: Ամեն դեպքում, սակայն, հարկ կա ճշտելու, թե իրականում ՌԴ ԱԳՆ-ն հարցում ստացե՞լ է APA գործակալությունից, եւ ո՞րն է Ռուսաստանի արտաքին քաղաքական գերատեսչության իրոք պաշտոնական դիրքորոշումը գնդապետ Ռուզինսկու հայտարարության եւ Գյուլիստանի պայմանագրի 200-ամյակին նվիրված մոսկովյան գիտաժողովում արտահայտված տեսակետների վերաբերյալ:
