ԹԵՀՐԱՆՈՒՄ ՍՊԱՆԵԼ ԵՆ ԱՐԴՅՈՒՆԱԲԵՐՈՒԹՅԱՆ ՓՈԽՆԱԽԱՐԱՐԻՆ
Թեհրանում սպանվել է արդյունաբերության, հանքերի եւ առեւտրի փոխնախարար Սաֆդար Ռահմաթ Աբադին: IRNA գործակալության տվյալներով, հանցագործությունը կատարվել է կիրակի ուշ երեկոյան: Իր ավտոմեքենայի ղեկի մոտ նստած Աբադին հրազենային երկու վերք է ստացել գլխին եւ կրծքին:
Ականատեսների խոսքերով, մարդասպանը Աբադիին մոտեցել է ուրիշ ավտոմեքենայով, խոսել էնրա հետ, ապա ատրճանակից երկու անգամ կրակել եւ փախուստի դիմել:
Ոստիկանության հիմնական վարկածը պատվիրված սպանությունն է:
Ռոյթեր գործակալությունը նշում է, որ չկան ակնհայտ նշաններ, թե այդ սպանությունը ինչ-որ ձեւով առնչվում է Ժնեւում «Վեցյակի» երկրների հետ Իրանի վարած «միջուկային բանակցություններին»: Աբադին փոխնախարարի պաշտոնը զբաղեցնում էր նախագահ Մահմուդ Ահմադինեժադի օրոք եւ այն պահպանեց նոր նախագահ Հասան Ռոուհանիի օրոք:
