Վ. Պ.
«Մաղթում եմ լավագույնը Ադրբեջանի նախագահի ձեր երրորդ ժամկետը սկսելու առնչությամբ», ոչ ավել, ոչ պակաս այդպես է ձեւակերպել իր կիսաշնորհավորական ուղերձը Ալիեւին Միացյալ Նահանգների նախագահ Բարաք Օբաման: Եվ այն, ինչ ադրբեջանական ողջ մամուլը ներկայացնում է որպես շնորհավորական նամակ, իրականում բնավ էլ այդ բովանդակությունը չունի` կապված Ադրբեջանի նախագահի վերընտրության հետ:
Օբաման իր նամակում, որ հասանելի է Ադրբեջանի նախագահ պաշտոնական կայքէջում, այդուհետեւ նշել է, որ կողմերը կշարունակեն ռազմավարական իրենց գործընկերության կարեւոր հարցերում երկխոսությունը:
«Ավելի քան 2 տասնամյակ շարունակվող մեր երկկողմ հարաբերությունները նշանակալից ներդրում են ունեցել տարածաշրջանային անվտանգության հարցում», նամակում նշել է Միացյալ Նահանգների նախագահը, ավելացնելով, որ ԱՄՆ-ը ողջունում է այդ ժամանակահատվածում Ադրբեջանի տնտեսական եւ սոցիալական տպավորիչ առաջընթացը` պատրաստակամ ընդհանուր մարտահրավերների պարագայում ամրապնդելու գործընկերությունն ու խորացնելու համագործակցությունը:
Միացյալ Նահանգներն ու Ադրբեջանը, ըստ Օբամայի, մի շարք հարցերում սերտ համագործակցություն ունեն, բարձր է գնահատվում գործընկերությունը Աֆղանստանում, ահաբեկչության դեմ պայքարի հարցերում:
Այդուհետեւ նամակի հեղինակը անդրադառնում է ղարաբաղյան խնդրին, նշելով, թե ԱՄՆ-ը պատրաստ է աշխատել Ադրբեջանի հետ «օգտագործելու խաղաղ, բանակցված կարգավորում գտնելու պատմական հնարավորությունը», միեւնույն ժամանակ ողջունելով այս ամսվա վերջին հանդիպելու մասին Ալիեւի եւ Հայաստանի նախագահի որոշումը: Դրա հետ մեկտեղ ԱՄՆ նախագահը խոսում է Հյուսիսային էներգետիկ միջանցքի, տնտեսական բազմազանեցման, տարածաշրջանային կայունության ու անվտանգության հարցերի շուրջը համագործակցության մասին:
Նամակում անդրադարձ կա նաեւ հենց ընտրություններին: Օբաման «խրախուսում է Ադրբեջանինՙ քայլեր ձեռնարկել մեծացնելու հարգանքը հավաքների, արտահայտվելու համընդհանուր ազատության նկատմամբ, նպաստելու քաղաքական բազմակարծությանն ու արդարադատության անկախությանը, նաեւ ամրապնդելու ընտրական համակարգը»:
Իր խոսքի վերջում Օբաման Ադրբեջանի ժողովրդին մաղթել է խաղաղություն եւ հաջողություն անկախության 22-ամյակի առնչությամբ, ստորագրելով նամակը` «Անկեղծորեն` Բարաք Օբամա, Ամերիկայի Միացյալ Նահանգների նախագահ»:
Նամակը փաստացի հետաքրքրական շեշտադրումներով մաղթանքների հավաքածու է, քան շնորհավորական ուղերձ, այն էլ «ռազմավարական գործընկեր երկրի վերընտրված նախագահի»:
