Վ. Ա.
Haqqin.az-ը, հղում անելով այսպես կոչված «Ամերիկա-Ադրբեջան ալյանսի» տարածած մամլո հաղորդագրությանը, տեղեկացնում է, որ նախօրեին Վաշինգտոնի հեղինակավոր սրահներից մեկում կազմակերպվել է «ճոխ խնջույք»: Միջոցառման հովանավորը եղել է Ադրբեջանի տրանսպորտի նախարարի որդին` Անար Մամեդովը, որը Միացյալ Նահանգներում ունի «հաջողակ գործարարի» համարում:
Խնջույքը նախատեսված է եղել 600 հրավիրյալի համար: Ընդ որում, դա երկրորդ նման միջոցառումն է: Կազմակերպիչը հետապնդել է Ադրբեջանի նախագահական «ընտրությունների» առթիվ ԱՄՆ քաղաքական շրջանակներում իշխող հիասթափությունը մեղմելու նպատակ:
Ավելի պարզ ասած, ադրբեջանցի օլիգարխ պաշտոնյայի որդին Վաշինգտոնում «հացի սեղան» է պատրաստել, որին հրավիրել է սենատորների, կոնգրեսականների եւ պետդեպարտամենտի ներկայացուցիչների, որպեսզի ամերիկացիներին շլացնի ադրբեջանական «ազգային հյուրասիրության եւ սրտաբացության ավանդույթներով»: Հետաքրքրական է, որ միջոցառման կազմակերպմանը ներգրավվել եւ խնջույքին մասնակցել է ԱՄՆ-ում Ադրբեջանի դեսպան Էլին Սուլեյմանովը:
Ըստ հաղորդագրության, խնջույքի հրավերն ընդունել են սենատորներ Ռիչարդ Բարը, Սաքսի Քեմբլիսը, Ռոջեր Ուիքերը, Թեդ Կոգանը, The Washington Times-ի եւ The Washington Diplomat-ի խմբագիրներ Լարի Բիսլին եւ Վիկտոր Չիբլին:
Փաստացի միջոցառումը տապալվել է, քանի որ ԱՄՆ պետական դեպարտամենտը պարզապես այն մատնել է անուշադրության: Այլ կերպ չէր էլ կարող լինել. Միացյալ Նահանգների արտաքին քաղաքական գերատեսչությունը չէր կարող Ադրբեջանի նախագահական «ընտրությունները» խիստ քննադատել, բայց իր ներկայացուցիչներին ուղարկել իլհամալիեւյան վարչախմբի կազմակերպած խնջույքին:
Թերեւս դա է պատճառը, որ երեկ Բաքվում իշխող վարչախումբը նոր հարձակում է սկսել ԱՄՆ կառավարության աջակցությունը վայելող Ազգային ժողովրդավարական իսնտիտուտի դեմ: Ադրբեջանի դատախազության հատուկ կարեւորության գործերով վարչությունը քրեական գործ է հարուցել Բաքվի ընտրությունների դիտարկման կենտրոնի դեմ: Մեղադրանքը հենվում է ԱՄՆ-ից այդ հաստատությանը տրված դրամաշնորհը «ոչ նպատակային, այն է` Ադրբեջանում զանգվածային անկարգություններ հրահրելու նպատակով օգտագործելու մասին ստացված ահազանգի վրա»:
Կատարվել է խուզարկություն, Ընտրությունների դիտարկման կենտրոնի փաստաթղթերը, համակարգչային տեխնիկան, կապի միջոցներն առգրավվել են: Գործով ձերբակալվածներ առայժմ չկան:
