Իլհամ Ալիեւը պաշտպանության նախարար է նշանակել ՆԳ նախարարի տեղակալ, ներքին զորքերի հրամանատար Զաքիր Հասանովին, որն ունի գեներալ-մայորի զինվորական կոչում: Virtualaz.org-ը, նորանշանակ նախարարի հետ հարցազրույց անցկացնելու հնարավորություն չունենալով, փորձել է նրա «դիմանկարը» ստեղծել` օգտագործելով տարբեր առիթներով մամուլին հայտնած տեսակետները:
Ստացվել է բավական խճողված պատկեր, չի հասկացվում` Հասանովը կո՞ղմ է, որ ադրբեջանական զինված ուժերը վերակազմավորվեն ՆԱՏՕ-ի չափանիշներով, թե՞ զինված ուժերի խորհրդային-ռուսաստանյան մոդելի համակիրն է: Ակնհայտ է, որ Հասանովը նույնպես կարեւորում է Թուրքիայի հետ ռազմական համագործակցության հանգամանքը:
Ինչ վերաբերում է ադրբեջանական բանակի մարտական հմտություններին, ապա, Հասանովի կարծիքով, նա «պետք է պատրաստ լինի պատերազմելու լեռնային տեղանքում, ինչպիսին Լեռնային Ղարաբաղն է»: Նորանշանակ նախարարը չի գտնում, որ պրոֆեսիոնալ բանակը լավագույնն է: Ընդհակառակըՙ «վարձկանները (հենց այդ բառն է օգտագործել նա- Վ.Ա.) միշտ նայում են գործի նյութական կողմին, եւ դրանով ամեն ինչ ասված է»:
Իհարկե, պաշտպանության նախարար նշանակվելով Հասանովը կարող է փոխել բանակի եւ ռազմական շինարարության մասին պատկերացումները: Կարեւոր էլ չէ, թե նա ինչ եւ երբ է ասել: Առավել հետաքրքրական է այդ նշանակման արձագանքը:
Ադրբեջանի զինված ուժերի Շամքորի բանակային կորպուսի հրամանատար Ռովշան Աքպերովը, որի հարաբերությունները նախկին նախարարի հետ չափազանց լարված էին, պաշտպանության նոր նախարարի նշանակումն անվանել է «բոլորի համար տոն»: Նրա վկայությամբ, «բանակային կորպուսների բոլոր հրամանատարներն ուրախ են, որ ազատվել են Աբիեւից»:
Հարցին, թե ճի՞շտ է, որ Հասանովի փոխարեն նշանակվելու է ներքին զորքերի հրամանատար, Աքպերովը պատասխանել է, թե «տեղյակ չէ, իրեն այդ մասին ոչինչ չեն ասել»:
Ավելի վաղ որոշ մեկնաբաններ կարծիք էին հայտնել, որ Աբիեւին փոխարինողների «ցուցակ գոյություն ունի, որտեղ երեք անուն կա` Ռովշան Աքպերով, Էբրուս Օրուջեւ եւ Վահիդ Ալիեւ»:
Ինչպես տեսնում ենք, Իլհամ Ալիեւը պաշտպանության նախարարի պաշտոնում նշանակել է բոլորովին այլ մարդու, որը կարծես զինված ուժերի տարբեր խմբավորումների հետ որեւէ առնչություն չի ունեցել: Երեկ, սակայն, Բաքվի ոչ իշխանական լրատվամիջոցներում տեղեկություններ են շրջանառվել, որ պաշտպանության նորանշանակ նախարարը «Ռամիզ Մեհթիեւի մարդն է»:
Այս կապակցությամբ haqqin.az-ին մեկնաբանություն է արել Ռամիզ Մեհթիեւի փեսան` Միլլի մեջլիսի պատգամավոր Իլհամ Ալիեւը, որի կարծիքովՙ «Ադրբեջանում իշխանության մեջ կլաններ չկան, պաշտպանության նախարարին նշանակում է նախագահը, ի՞նչ կապ ունի դրա հետ Ռամիզ Մեհթիեւը»:
Խնդրի ողջ նրբությունը նրանում է, որ Սաֆար Աբիեւը Բաքվի իշխող վարչախմբում ուներ արեւմտամետ գործչի համարում եւ հանդես էր գալիս ադրբեջանական բանակը ՆԱՏՕ-ի ստանդարտներին համապատասխանեցնելու ծրագրի օգտին: Աբիեւին էին վերագրվում նաեւ ռազմատեխնիկական համագործակցության ոլորտում Իսրայելի հետ վերջին տարիների սերտացած կապերի հաջողությունը:
Իսկ Ռամիզ Մեհթիեւը համարվում է «Կրեմլի դրածո»: Եվ եթե իրականությանը մոտ է, որ նրանշանակ պաշտպանության նախարարը «նրա մարդն է», ապա ենթադրելի՞ է արդյոք, որ Ադրբեջանը ռազմական գերատեսչության առումով նախապատվություն է տալիս հարաբերությունների «հյուսիսային վեկտորին»: Սա շատ բազմանշանակ կիներ…
