Վիրավորված զինվորների կյանքին վտանգ չի սպառնում
«Կրակոցներ դիրքերի ուղղությամբ շարունակվել են նաեւ երեկ, գյուղի կողմը կրակոց չկա, բայց բնակիչները վախեցած են», «Ազգ»-ի հետ հեռախոսազրույցում ասաց Պառավաքարի գյուղապետ Ռոլանդ Մարգարյանը ՙ հավելելով, որ նախօրեին կրակոցներից եւ զինվորի մահից հետո գյուղում շատերը դեռ «շոկից» դուրս չեն եկել. շատերն էլ վախենում են փողոց դուրս գալ:
Արդեն երկրորդ օրն էՙ Պառավաքար-Վազաշեն ճանապարհը փակ է: Գյուղապետի խոսքերովՙ դեռ մի քանի օր էլ ճանապարհը փակ կլինի, քանի որ խիստ վտանգավոր է այդ հատվածի օգտագործումը:
«Ազգ»-ն արդեն տեղեկացրել էր, որ Իջեւան-Բերդ ավտոճանապարհի Պառավաքարի հատվածում հակառակորդը կրակ էր բացել քաղաքացիական եւ զինվորական մեքենաների վրա: Զինծառայողներին մարտական հերթապահության տեղափոխող զինվորական մեքենաների շարասյան վրա բացված կրակից զոհվել էր ժամկետային զինծառայող, 19-ամյա շարքային Գարիկ Արտակի Պողոսյանը: Հրազենային տարբեր աստիճանի վիրավորումներ են ստացել ժամկետային զինծառայողներ, շարքայիններ Արթուր Անդրանիկյանը, Արայիկ Ժամհարյանն ու Մարտին Պետրոսյանը:
Պաշտպանության նախարարությունից տեղեկացանք, որ զինվորներից մեկն արդեն դուրս է գրվել, մյուս երկուսը շարունակում են համապատասխան բուժում ստանալ Մուրացանի հոսպիտալում. նրանց կյանքին վտանգ չի սպառնում, առողջական վիճակը գնահատվում է նորմալ:
ՊՆ-ից դեպքի մասին համապատասխան իրազեկել են ԵԱՀԿ հատուկ ներկայացուցիչ Անջեյ Կասպրչիկի գրասենյակին, միաժամանակ շեշտելով, որ կատարվածի պատասխանը հայկական կողմը չի ուշացնի: «Հակառակորդի այս հանցավոր քայլն անպատասխան չի մնա, եւ հերթական անգամ կատարված սադրանքի պատասխանատվությունը կմնա սանձազերծողի վրա», հայատարարել է ՊՆ-ն:
ՀՀ Պն քննչական ծառայությունից տեղեկացրին, որ կատարվածի առնչությամբ հարուցվել է քրեական գործ ՀՀ ՔՕ 104-րդ հոդվածի 2-րդ մասի 13-րդ կետիՙ սպանություն ազգային, ռասայական կամ կրոնական ատելության կամ կրոնական մոլեռանդության շարժառիթներով եւ 34-104 հոդվածի 2-րդ մասի 1-ին եւ 13-րդ կետերիՙ սպանության փորձ երկու կամ ավելի անձանց նկատմամբ ազգային, ռասայական կամ կրոնական ատելության կամ կրոնական մոլեռանդության շարժառիթներով հատկանիշներով:
