Տարածաշրջանային հետազոտությունների կենտրոնի տնօրեն, քաղաքագետ Ռիչարդ Կիրակոսյանը , անդրադառնալով Վիլնյուսի գագաթաժողովից առաջ տարածաշրջանային զարգացումներին` երեկ «Peoplemeter» ակումբում լրագրողների հետ հանդիպման ժամանակ ասաց, որ Մաքսային միությանը Հայաստանի միանալու որոշումը հարցերի տեղիք է տալիս, քանի որ Հայաստանի նախագահը դեռեւս չի բացատրել Մաքսային միությանը Հայաստանի միանալու որոշման հանգամանքները: Ռուսաստանը նույնպես չի ասել, թե ե՞րբ ու ինչպե՞ս է Հայաստանը միանալու Մաքսային միությանը: Իսկ իր որոշմամբ Հայաստանն ավելի շատ ոչ ասաց Եվրոմիությանը, քան այո Մաքսային միությանը:
Քաղաքագետի խոսքով` Հայաստանն առավել կայուն երկիր է, քան տարածաշրջանի մյուս պետությունները, սակայն այսօր այս առավելությունը վտանգի տակ է: Իսկ հայ-ռուսական հարաբերությունները, ըստ Ռիչարդ Կիրակոսյանի, թեեւ շատ կարեւոր են, սակայն քննադատելի են դրանցում առկա վստահության պակասն ու անհամաչափությունը:
Ռիչարդ Կիրակոսյանը նաեւ ընդգծում է, որ դեռեւս հստակ չէ` Հայաստանն իրապես կանդամակցի՞ Մաքսային միությանը, թե՞ ոչ. «Իրականում Սերժ Սարգսյանը սեպտեմբերի երեքին ոչ մի փաստաթուղթ չի ստորագրել, եւ նրա մշուշոտ խոստումը դեռեւս փաստ չէ»: Բացի դրանից` հետաքրքրական եւս 2 զարգացումներ են տեղի ունեցել Մաքսային միությանը միանալու որոշումից հետո: Ըստ նրա` Բելառուսն ու Ղազախստանն այնքան էլ հակված չեն Հայաստանին ընդունելու Մաքսային միության շարքերը, եւ երկրորդ զարգացումն այն է, որ հիասթափություն ապրեցին օտարերկրյա ներդնողները, որոնք կցանկանային ներդրումներ անել ոչ թե Մաքսային միության, այլ Եվրոմիության հետ սերտ կապեր ունեցող պետությունում:
