Հասարակության ամենացավոտ խնդիրները
Եվրոպայի խորհրդի մարդու իրավունքների հանձնակատար Նիլս Մուիժնիեկսը եւ Հայաստանի մարդու իրավունքների պաշտպան Կարեն Անդրեասյանը երեկ հանդիպել են սիրիահայ ներգաղթյալներին, ծանոթացել նրանց խնդիրներին:
«Ազգ» -ի հարցին Նիլս Մուիժնիեկսը պատասխանեց, որ Եվրոպայում զարմացած էին եւ տեղյակ չէին, որ Հայաստանում 7000-10000 սիրիահայ կա:
«Նրանք ասացին, որ գոհ են Հայաստանի իշխանությունների ընդունելությունից, ինչը չեն կարող ասել եվրոպական այլ երկրների իշխանությունների իրենց հայրենակիցների մասին: Սա ազդակ է, որ եվրոպական երկրները պետք է կարողանան ավելի խորությամբ ընկալել սիրիական խնդիրը», ասաց հանձնակատարը:
ՄԻՊ Կարեն Անդրեասյանն էլ ասաց, որ թեպետ սիրիահայերը գոհ են մնացել Հայաստանի իշխանություններից, սակայն ունեն երկու խնդիրՙ չեն կարողանում աշխատանք գտնել եւ բախվում են սոցիալական անարդարություններին:
«Ես համոզված եմ, որ այդ պատախանը կտան ոչ միայն սիրիահայերը: Հետեւաբար Հայաստանի համար կարեւորագույն խնդիրները շարունակում են մնալ հացն ու արդարությունը: Հայաստանում մարդու իրավունքների առնչությամբ ամենալուրջ խնդիրը շարունակում է մնալ արդար դատաքննությունը, դատարանների ապօրինությունները շարունակվում են եւ խնդիրը շատ ցավոտ է: Տնտեսական-սոցիալական իրականությունը սարսափելի է, եւ հացի խնդիրը դարձել է արդիական»:
