Վերլուծաբանները կարեւորում են, որ ԵԱՀԿ ՄԽ ամերիկացի համանախագահ Ուորլիկն արդեն «երկրորդ սեպարատ ուղեւորությունն է կատարում»: Ընդգծվում է նաեւ, որ, ի տարբերություն առաջին այցի, ամերիկացի դիվանագետն «այս անգամ Երեւան չի ուղեւորվի»:
Հատկանշական է նաեւ, որ Ուորլիկը Բաքու է այցելել Իլհամ Ալիեւի «երդմնակալության» հենց հաջորդ օրը: Պաշտոնական հաղորդագրության համաձայն, ԵԱՀԿ ՄԽ ամերիկացի համանախագահը հանդիպումներ եւ «արդյունավետ քննարկումներ է ունեցել նախագահ Ալիեւի եւ արտգործնախարար Մամեդյարովի հետ»:
Ուորլիկի Ադրբեջան այցը տեղի է ունեցել այն պահին, երբ այդ երկրի կառավարությունը ողջ կազմով հրաժարական է ներկայացրել` կապված նախագահի պաշտոնում Իլհամ Ալիեւի «վերընտրվելու» հետ:
Փաստացի նա հանդիպել է ԱԳ նախարարի պաշտոնակատար Մամեդյարովի հետ: Սա փոքր-ինչ արտառոց է:
Միաժամանակ, հայտնի է, որ նոյեմբերի սկզբներին ԵԱՀԿ ՄԽ համանախագահներն ամբողջ կազմով կլինեն Ադրբեջանում եւ Հայաստանում: Անոնսավորվել է, որ նրանք կփորձեն նախապատրաստել Սարգսյան-Ալիեւ հանդիպում: Դատելով ադրբեջանցի որոշ պաշտոնյաների երկիմաստ արտահայտություններից, Ուորլիկը Բաքվում էր, որպեսզի բարձր մակարդակի հանդիպման հարցը նախապես քննարկի Իլհամ Ալիեւի հետ:
Վերջինս, ինչպես հայտնի է, կապված նախագահական ընտրությունների հետ, «թայմ-աուտ» էր խնդրել: Ավելի վաղ միջնորդները հույս ունեին Սարգսյան- Ալիեւ հանդիպում կազմակերպել «ամառվա վերջին-աշնան սկզբին»: Այսօր խոսվում է «մինչեւ նոյեմբերի վերջը» նման հանդիպում կազմակերպելու հնարավորության» մասին:
Ադրբեջանի փոխարտգործնախարար Արազ Սզիմովը երեկ ասել է, թե իրենք չեն մերժում նման հանդիպման կարեւորությունը, «բայց հանդիպում` հանուն հանդիպման անհրաժեշտություն չեն տեսնում»: Ազիմովի խոսքերով, Ադրբեջանը «հակառակ կողմից (Հայաստանից) չի տեսնում կարգավորման պատրաստակամություն»:
Սա, իհարկե, ադրբեջանական ստանդարտ դեմագոգիա է: Բայց դրանից կարելի է ենթադրել, որ Իլհամ Ալիեւը պատրաստ չէ բարձր մակարդակի հանդիպման: Ադրբեջանում հետընտրական իրավիճակը չափազանց բարդ է ստացվել` ի հակակշիռ վարչախմբի լավատեսության: Այնքան բարդ, որ Իլհամ Ալիեւը որեւէ փոփոխություն կատարելու համարձակություն իսկ չունի:
Երեկ նա խորհրդարանին է ներկայացրել նոր-գործող վարչապետ Արթուր Ռասիզադեի թեկնածությունը, եւ Միլլի մեջլիսն իսկույն դակել է նախապես պատրաստի որոշումը: Ռասիզադեն 78 տարեկան է, կառավարությունում աշխատում է1980-ական թվականներից, եղել է խորհրդային Ադրբեջանի Նախարարների խորհրդի նախագահի (վարչապետի) տեղակալ, առաջին տեղակալ, վարչապետի պաշտոնում նշանակվել Հեյդար Ալիեւի օրոք:
Ռասիզադեի վերանշանակումը խոսում է այն մասին, որ «այս իշխանությունը որեւէ բարեփոխման պատրաստ չէ», իրավիճակը գնահատել է քաղաքագետ Զարդուշտ Ալիզադեն: Պատճառն այն է, որ «ընտրություններից» հետո Իլհամ Ալիեւի վարչախումբը հայտնվել է գրեթե միջազգային մեկուսացման մեջ: Արտաքին աջակցության բացակայության պայմաններում գնալ ուժերի վերադասավորության, հավասար կլիներ ինքնասպանության, քանի որ չկա երաշխիք, որ «հին-հեյդարալիեւյան գվարդիան» վրեժխնդիր չի լինի:
Նման հիմար իրավիճակում հայտնված Իլհամ Ալիեւը չի կարող ԼՂ հարցում որեւէ պատասխանատվություն ենթադրող քայլի գնալ, իսկ բարձ մակարդակի հանդիպման փաստն ինքնին կխոսեր ինչ-որ կարեւոր քայլերի մասին: Ահա թե ինչու է Արազ Ազիմովը «հիվանդ գլխից առողջի վրա» բարդում սեփական երկրի խնդիրները:
Իրավիճակին բավական զավեշտ է հաղորդել ԵԱՀԿ ՄԽ ամերիկացի համանախագահը: «Թուրան» գործակալության հաղորդմամբ, դեսպան Ուորլիկը «Թվիթերի» անձնական միկրոբլոգում այսպիսի գրառումներ է արել Բաքվից ստացած տպավորությունների մասին. «Ճաշեցի արտգործնախարար Մամեդյարովի հետ, փիթի էր հյուրասիրել, գառան միսը սքանչելի էր, բայց որտե՞ղ գտնեմ իսկական ադրբեջանական ձեռագործ գորգ»:
Եթե ադրբեջանական լրատվամիջոցն ամերիկացի համանախագահին անվանարկելու խնդիր չի ունեցել, եւ դեսպան Ուրոլիկն իրոք նման գրառումներ է թողել, ապա կարելի է միայն պատկերացնել, թե ինչքան «արդյունավետ» են եղել Բաքվում նրա հանդիպումները:
