Հունվար-սեպտեմբերին աճը կազմել է 3,2 տոկոս
Հայաստանի ազգային վիճակագրական ծառայության երեկ հրապարակած 2013-ի հունվար-սեպտեմբեր ամիսների սոցիալ-տնտեսական ցուցանիշների համաձայն, Հայաստանի տնտեսական ակտիվության ցուցանիշը (ՏԱՑ) նախորդ տարվա նույն ժամանակահատվածի համեմատ աճել է 3,2 տոկոսով: Հարկ է նշել, որ ամսեամիս աճի տեմպը դանղաղում է: Սեպտեմբերին նախորդ տարվա սեպտեմբերի համեմատ տնտեսական ակտիվության աճը կազմել է ընդամենը 0,2 տոկոս, իսկ այս տարվա օգոստոսի նկատմամբ` 10,3 տոկոս:
Ներկայացնենք տնտեսության ճյուղերում առանձին-առանձին հունվար-սեպտեմբերին արձանագրված ցուցանիշները:
Արդյունաբերությունում այս տարվա 9 ամիսներին արձանագրվել է 7 տոկոս աճ: Արդյունաբերության աճի տեմպի ավելացումը միակ ուրախալի փաստն է այս անգամ: Մնացած բոլոր ճյուղերում աճի տեմպը նվազել է: Գյուղատնտեսությունում արձանագրվել 5,5 տոկոս աճ, ծառայությունների ոլորտում` 2,8 տոկոս, առեւտրի շրջանառությունում` 2,1 տոկոս աճ, շինարարությունում արձանագրվել է 9,2 տոկոս անկում:
Գումարային առումով ամենամեծ ծավալ ունի առեւտրի շրջանառությունը` 1 տրլն 546 մլրդ 337 մլն դրամ, իսկ երկրորդ տեղում արդյունաբերությունն է` 874 մլրդ 615 մլն դրամ համախառն արտադրանքի ծավալով, երրորդը ծառայությունների ոլորտն է` 740 մլրդ 770 մլն դրամ ծավալով, չորրորդը` գյուղատնտեսությունը` 663 մլրդ 413 մլն դրամ համախառն արտադրանքի ծավալ եւ վերջինը շինարարությունն է, որի ծավալը կազմել է 244 մլրդ 963 մլն դրամ:
Միայն սեպտեմբերին նախորդ տարվա սեպտեմբերի նկատմամբ արդյունաբերությունում 12,7 տոկոս աճ է գրանցվել, գյուղատնտեսությունում` 1,5 տոկոս, ծառայությունների ոլորտում` 0,4 տոկոս, առեւտրում` 0,9 տոկոս անկում, շինարարությունում` 11,9 տոկոս անկում:
Արտաքին առեւտրաշրջանառությունը 2013-ի առաջին 9 ամիսներին 2012-ի նույն ժամանակահատվածի նկատմամբ ավելացել է 4,5 տոկոսով եւ կազմել մոտ 4 մլրդ 159 մլն դոլար: Արտահանումը կազմել է 1 մլրդ 88 մլն դոլար, արձանագրելով 10,6 տոկոս աճ, ներմուծումը կազմել է 3 մլրդ 81 մլն դոլար, աճելով 2,5 տոկոսով: Այս տարվա հունվար-սեպտեմբերին արտահանումը կազմել է ներմուծման մոտ մեկ երրորդը, իսկ արտաքին առեւտրի բացասական հաշվեկշիռը կազմել է գրեթե 2 մլրդ դոլար:
Միայն սեպտեմբեր ամսին արտաքին առեւտրաշրջանառությունն աճել է 18,4 տոկոսով եւ կազմել 513 մլն դոլար: Արտահանումը կազմել է 136,4 մլն դոլար, ավելանալով 23,3 տոկոսով, ներմուծումը կազմել է 376,7 մլն դոլար, աճելով 16,7 տոկոսով:
Միջին ամսական աշխատավարձը Հայաստանում հունվար-սեպտեմբերին կազմել է մոտ 146 հազար դրամ, մասնավոր հատվածում` 180 հազար դրամ, պետականումՙ 116 հազար դրամ:
Այսպիսով, հարկ է արձանագրել, որ տնտեսական ակտիվությունը Հայաստանում թեեւ շարունակում է աճել, բայց աճի տեմպը շարունակում է դանդաղել: Տնտեսության ճյուղերից միայն արդյունաբերությունն է ունեցել արտադրանքի ճավալների աճի տեմպի ավելացում, մյուսների դեպքում` աճը կամ դանդաղել է կամ անկում է արձանագրվել:
