Վ. Պ.
«Պայքար Եվրոպայում խտրականության, այլատյացության եւ անհանդուրժողականության դեմ»
Երբ իրավունքների պաշտպանությունը տգեղ դրսեւորումներ է ունենում, կարելի է միշտ պատճառաբանել, թե այլ ելք չէր մնացել: Սակայն շատ պարագաներում իրավունքի պաշտպանությունն ինքնին այնպիսին պետք է լինի, որ որեւէ այլ իրավունքի սահմանափակում կամ ոտնահարում չդրսեւորվի:
Հայաստանի արտգործնախարար, Եվրոպայի խորհրդի Նախարարների կոմիտեի նախագահ Էդվարդ Նալբանդյանը եւ ԵԽ գլխավոր քարտուղար Թորբյորն Յագլանդը երեկ Երեւանում բացեցին «Պայքար Եվրոպայում խտրականության, այլատյացության եւ անհանդուրժողականության դեմ» բարձրաստիճան խորհրդաժողովը, որի մասին քանիցս հայտարարել էր Նալբանդյանը: Խորհրդաժողովը տեղի էր ունենում Եվրոպայի խորհրդի Նախարարների կոմիտեում Հայաստանի նախագահության շրջանակներում:
Խորհրդաժողովին մասնակցելու նպատակով Երեւան էին ժամանել Եվրոպայի խորհրդի անդամ երկրների, ԵԽ հիմնական կառույցներիՙ Ռասիզմի եւ անհանդուրժողականության դեմ եվրոպական հանձնաժողովի բարձրաստիճան ներկայացուցիչներ, գլխավոր քարտուղարության, ինչպես նաեւ միջազգային հաստատություններիՙ ՄԱԿ-ի, ԵԱՀԿ-ի, Եվրոպական միության եւ Արաբական պետությունների լիգայի ներկայացուցիչները:
Միջոցառման բացման արարողությանը ներկա էին եւ ելույթներով հանդես եկան նաեւ ԵԽ մարդու իրավունքների հանձնակատար Նիլս Մուիժնիկսը, ԵԽ Տեղական եւ շրջանային իշխանությունների կոնգրեսի փոխնախագահ Մայքլ ՕԲրայենը, ԵԱՀԿ մամուլի ազատության հարցերով ներկայացուցիչ Դունյա Միյատովիչը, Եվրոպայի խորհրդի խորհրդարանական վեհաժողովի հավասարության եւ խտրականության բացառման հանձնաժողովի անդամ Յոնաս Գունարսոնը, Եվրոպայի խորհրդի Միջազգային ոչ կառավարական կազմակերպությունների կոնֆերանսի նախագահ Ժան-Մարի Հեյդտը, Արաբական պետությունների լիգայի գլխավոր քարտուղարի տեղակալ Ֆադել Մոհամեդ Ջավադը:
Ու մինչ ելույթ կունենար Հայաստանի արտգործնախարարը, «Արմենիա-Մարիոթ» հյուրանոցի մուտքի մոտ բողոքի ակցիա իրականացնող մի խումբ երիտասարդները ներխուժեցին խորհրդաժողովի դահլիճ, ու թեեւ խաղաղությամբ, առանց ավելորդությունների` փորձ արեցին խափանել ներսում ընթացող աշխատանքը: Ակտիվիստների ձեռքներին Շարմազանովի, Արծվիկ Մինասյանի, Խաչիկ Ասրյանի նկարներով պաստառները բացատրություն ունեին, թե եվրոպացի չինովնիկները չպետք է քննարկում անցկացնեն «ֆաշիստների» հետ:
Թե մեր հասարակությունում ով որքանով է անհանդուրժող այս կամ այն երեւույթի նկատմամբ` հաստատ այնպիսի մասշտաբների չի հասել, որ ֆաշիզմ որակվի, ընդ որում` այն հանգամանքի ֆոնին, որ ակտիվիստները մնացին կանգնած դահլիճում` շարունակելով ի ցույց դնել իրենց պաստառները: Այսինքն`«ֆաշիստ» ասվածների իշխանությունը հանդուրժող է գտնվել ու թույլ տվել ակցիան անցկացնել անգամ դահլիճում: Մյուս կողմից, մի քանի երիտասարդների իրենց պաստառներով հանդերձ դահլիճում հանդուրժելն ավելի շատ օգուտ տվեց իշխանություններին, քան վնասեցին, ինչին թերեւս ձգտում էին ակցիայի մասնակիցները:
Նրանց ներկայությամբ խոսք էր ասում նաեւ ԵԽ գլխավոր քարտուղար Թորբյորն Յագլանդը, շեշտելով, որ մեծամասնությունը պետք է ապահովի փոքրամասնության` սեռական, ազգային, կրոնական, պաշտպանությունը: Սա էլ թերեւս նպաստել է, որ փաստացի փոքրամասնությունների իրավունքների պաշտպանության հովերով դահլիճ ներխուժածները մոռանան «ֆաշիստներին» ու դուրս գան:
Ամեն դեպքում, երկօրյա խորհրդաժողովի օրակարգում ընդգրկված են ԵԽ անդամ պետությունների հասարակություններին հուզող այնպիսի հարցեր, ինչպիսիք են ռասիզմի եւ ատելության խոսքի դրսեւորումները քաղաքական բանավեճում, քաղաքական առաջնորդների եւ քաղաքացիական հասարակության դերը այդ երեւույթների դեմ պայքարի գործում, կանխարգելող միջոցների արդյունավետ օգտագործումը, ռասայական կարծրատիպերի հաղթահարումը, այլատյացության ու անհանդուրժողականության դրսեւորումների եւ ատելության խոսքի տարածման բացառումը եւ այլն:
