Առողջապահության նախարարության գլխավոր ակնաբույժ Ալեքսանդր Մալայանը երեկ ասուլիսի ժամանակ տեղեկացրեց, որ Մալայանի անվան ակնաբուժական կլինիկայի գլաուկոմայի բաժանմունքում արդեն կիրառվում է ամերիկյան Այ-Ստենտ տրաբեկուլար միկրո իմպլանտը, որի միջոցով հնարավոր է կանխել գլաուկոմայի առաջխաղացումը: «Գլաուկոս» կորպորացիայի մշակած այս սարքը նվազեցնում է ներակնային ճնշումը: Գլաուկոմա հիվանդության ժամանակ տուժում է տեսողական նյարդը հենց ներակնային ճնշման տատանումների հետեւանքով:
Ալեքսանդր Մալայանն ասում է, որ սխալ է տպավորությունը, թե գլաուկոման անբուժելի հիվանդություն է: Գլաուկոման հանգեցնում է կուրության այն ժամանակ, երբ ժամանակին չի բուժվում: Ալեքսանդր Մալայանը դիմել է առողջապահության նախարարություն, որպեսզի ակնաբուժական կենտրոնների ընդգրկմամբ իրականացվեն աշխատանքներ բնակչության մեջ գլաուկոմայի վաղ հայտնաբերման ուղղությամբ:
Ս. Մալայանի անվան ակնաբուժական կլինիկայի գլաուկոմայի բաժանմունքի ղեկավար Լիլիթ Ոսկանյանը, որն էլ հենց տեղադրում է Այ-Ստենտ իմպլանտը, նշեց, որ գլաուկոմայի վաղ հայտնաբերման ժամանակ սարքի տեղադրումը համարվում է իդեալական միջոց: Իսկ տեղադրումը կատարվում է առավելագույնը 3 րոպեում:
Լիլիթ Ոսկանյանի գնահատմամբ` այս սարքը գլաուկոմայի բուժման առաջին ու ապահով մեթոդը լինելուց բացի` կարող է մեր երկիրը որպես մոդել ու գերացանզության կենտրոն ներկայացնել ամբողջ աշխարհում:
Հայաստանում շուրջ 2300 հիվանդի արդեն տեղադրվել է Այ-Ստենտ: Սարքը հիվանդների համար անվճար է, հիվանդները վճարում են միայն գլաուկոմայի վիրահատության գումարը:
Այ-Ստենտի գյուտի հեղինակը Հայկական ակնաբուժության նախագծի տնօրենների խորհրդի անդամ, Կալիֆոռնիայի համալսարանի պրոֆեսոր, բժիշկ Ռիչարդ Հիլն է: Նա շատ անգամ է եղել Հայաստանում ու այստեղ կատարել վիրահատություններ:
