Տեխասում (ԱՄՆ) «Ստրատեջիք Բուքս» հրատարակչությունը անգլերեն լեզվով լույս է ընծայել կիպրահայ Տիգրան Գալայճյանի «Ճշմարտության պահապանը: Գուրգեն Յանիգյան եւ հայոց ցեղասպանության ուրացման դեմ պայքարը» (Sentinel of Truth- Gourgen Yanikian and the Struggle Against the Denial of the Armenian Genocide) խորագրով գիրքը, որտեղ նկարագրված են 1973-ին Կալիֆոռնիայում հայոց ցեղասպանությունից մազապուրծ Գուրգեն Յանիգյանի կողմից երկու թուրք դիվանագետների սպանության շարժառիթները:
Գրող Մայքլ Հանթ այդ առթիվ ասել է, որ գիրքը հանձնարարելի է բոլոր նրանց, ովքեր հետաքրքրվում են 20 դարի պատմությամբ եւ արդարադատության խնդիրներով, նաեւ ընդհանուր ընթերցող հասարակությանըՙ որպես տեղեկատվական եւ փաստացի հուզիչ տվյալներ պարունակող մի հատոր «եվրոպական պատմության մեջ քիչ ճանաչված մի հարցի վերաբերյալ»:
Գրքի հեղինակ Տիգրան Գալայճյանը ավարտել է Լոնդոնի Տնտեսագիտության եւ քաղաքական գիտությունների համալսարանը: Առեւտրական է եւ անդամ Գալայճյան հիմնարկի վարչության: Ապրում է Լառնակայում (Կիպրոս) կնոջ եւ երկու զավակների հետ: Ճանաչված ու հարգված ակտիվ հասարակական գործիչ է հայկական համայնքում:
