«Ասկե գրուպ» ընկերության կողմից 300 մլն դրամը գերազանցող ապրանքների ներմուծման դեպքում հաշվարկված ԱԱՀ գումարի վճարման ժամկետը երկարաձգվել է եւս երկու ամսով` մինչեւ 2013-ի հոկտեմբերի 30-ը: Կառավարությանը երեկ ընդունած իր այս որոշումը բացատրում է նրանով, որ ընկերությունը վերազինում է ձուլման արտադրամասը` վերապրոֆիլավորելով ամրանների արտադրություն կազմակերպելու համար: Իրականացվելու է ավելի քան 8,5 մլրդ դրամի ներդրում, մինչեւ տարեվերջ ավարտվելու է վերազինումը, ստեղծվելու է մոտ 300 նոր աշխատատեղ:
«Թեղուտ» ընկերության կողմից 300 մլն դրամը գերազանցող ապրանքների ներմուծման դեպքում հաշվարկվող ԱԱՀ-ն կհետաձգի երեք տարով: Ներդրումային ծրագրով կառուցվող հանքաքարի հարստացման եւ խտանյութի արտադրության ֆաբրիկան, որը շահագործման է հանձնվելու 2015-ին, տարեկան կվերամշակի 7 մլն տոննա հանքաքար: Նախատեսվում է շինարարության ընթացքում կազմակերպության ստեղծած ավելի քան 1000 ժամանակավոր աշխատատեղը փոխարինել նույն քանակով մշտական աշխատատեղով` 150 հազար դրամ միջին աշխատավարձով: Ի դեպ, նույն պահին կառավարության շենքի առջեւ Թեղուտի հանքավայրի շահագործման դեմ բողոքի ցույց էին անցկացնում մի խումբ բնապահպաններ:
