Հարավային Կալիֆոռնիայի համալսարանի (USC) «Շոա հիմնադրամը», որի թվայնացված արխիվներում շուտով տեղ են գտնելու նաեւ հայերի ցեղասպանության ականատեսների եւ վերապրողների վկայությունների 400 կինոժապավեններ, հոկտեմբերի 3-ին Նյու Յորքում կայացած գալա-ճաշկերույթի ժամանակ պատվել է ճանաչված դերասան Ջորջ Կլունիին: «Արմինյն միրոր-սփեքթեյթր» շաբաթաթերթի փոխանցմամբՙ մեծ թվով հայեր են ներկա գտնվել այդ միջոցառմանը, որը նախագահել է վերոնշյալ հիմնադրամի նախաձեռնող-հիմնադիր, միջազգային ճանաչման արժանացած ռեժիսոր Սթիվն Սփիլբերգը:
Հայկական պատվիրակության կազմում է եղել նաեւ Հայաստանում Մ. Նահանգների նախկին դեսպան Ջոն Մարշալ Էվանսը: Կլունիի մարդասիրական գործունեությունը պատվելու այս գալա-ճաշկերույթը վարել է Ջոն Ստյուարտը: «Շոա հիմնադրամը» վերջերս նյութական հանգանակությունների հավաքման ակտիվ ընթացակարգ է նախաձեռնել, որպեսզի իրականություն դարձնի մինչեւ 2015-ը հայկական վկայությունների ամբողջական ընդգրկումը «Շոայի պատմության տեսողական արխիվներում», որն ամենամեծ թվայնացված հավաքածուն է ամբողջ աշխարհում: Ունի 105 հազար ժամ տեւողությամբ տեսավկայություններ, որոնց կարելի է ծանոթանալ աշխարհի 44 հաստատություններում: Ամեն տարի մոտ մեկ միլիոն ուսանողներ, դասախոսներ եւ հետազոտողներ օգտվում են դրանցից: Ավելինՙ հազարավոր բարձրդասարանցիներ կարող են ծանոթանալ դրանց Iwitness կրթական կայքի միջոցով: «Հայկական ֆիլմերի հաստատության» (հիմնադիրՙ Ջ. Մայքլ Հակոբյան) եւ «Շոա հիմնադրամ-հաստատության» միջեւ համաձայնությունը կնքվել էր 2010 թվին:
