Վ. Պ.
Վրաստանի Սամցխե-Ջավախքի եւ Քվեմո-Քարթլիի հայկական հասարակական կազմակերպությունների խորհուրդը հայտարարություն է տարածել, որում դիմում է Վրաստանի կառավարությանը, որպեսզի վերջինս զերծ մնա երկակի ստանդարտների կիրարկումից եւ շուտափույթ կերպով ձեռնամուխ լինի տարածաշրջանում հայերենին տարածաշրջանային կարգավիճակ շնորհելուն:
«Հարավային դարպաս» կայքէջի տեղեկացմամբՙ սեպտեմբերի վերջին Վրաստանի ակադեմիական շրջանակները խորհրդարան օրենսդրական նախաձեռնություն են ներկայացրել, որը վերաբերում է Վրաստանի պետական լեզվի չափանիշների խախտման դեպքում տուգանքների կիրառմանը: Որ Վրաստանում որոշ ազգայնամոլներ այդպիսի մտադրություն կարող էին ունենալ, անգամ ցանկություն, հաստատ ժխտելի հանգամանք չէ, սակայն օրենսդրական մակարդակով հարցին մոտեցումն արդեն այդ երկրում այլատյացության մասին ուրիշ որակումների տեղիք է տալիս:
Ըստ աղբյուրիՙ այդ նախագիծը վրաց խորհրդարանի կրթության, գիտության եւ մշակույթի հանձնաժողովում է: Դրանով նախատեսվում է, որ պետք է հիմնվի պետական բյուջեով ֆինանսավորվող մարմին, որը վերահսկելու է պետական լեզվի պաշտպանությունը: Պետական մարմինը վերահսկելու է պաշտոնական փաստաթղթերը, գովազդերը, լրատվամիջոցների կողմից ներկայացվող տեղեկատվությունը եւ խախտումների բացահայտման դեպքում սահմանելու է պատժամիջոցներ:
Խորհրդի հայտարարությունում ասվում է, որ նման նախաձեռնությունն առաջինը չէ: Այս գործընթացն իր դրսեւորումներն էր ունեցել նաեւ 2012 թ., երբ ներկայիս վարչապետ Բիձինա Իվանիշվիլու թիմակիցները հայտարարեցին այսպես կոչված «լեզվի ոստիկանության» ստեղծման մասին:
Հայտարարությունում ասված է, որ կառավարության ներկայիս քաղաքականությունը ազգային փոքրամասնությունների վերաբերյալ միայն բարդացնում է ջավախահայության վիճակը: «Ելնելով այն հանգամանքից, որ Վրաստանի ամբողջական տարածաշրջաններ բնակեցված են ոչ վրացական ազգություններով, իսկ վրացական իշխանությունները մինչ օրս չեն ստորագրել կամ վավերացրել բնիկ ժողովուրդների եւ ազգային փոքրամասնությունների լեզվական իրավունքներին վերաբերող միջազգային փաստաթղթերը, դրանց միանալու դեպքում էլՙ երկրում չեն մշակվել եւ կիրառության մեջ դրվել համապատասխան օրենքները, վերոնշյալ ողջ գործընթացն իր անմիջական ազդեցությունն է գործելու Վրաստանի կազմում գտնվող մի շարք տարածաշրջանների վրա», ասվում է հայտարարությամբ:
Նույն փաստաթղթով մտավախություն է արտահայտվում, որ միջազգային պարտավորությունների չկատարման, օրենսդրական այսպիսի բացի պայմաններում վրացական իշխանությունների այս քայլերը նշյալ հայահոծ տարածաշրջաններում տեղի են տալու նոր հուզումների, «կրկին մեծանալու է վրացական իշխանությունների հանդեպ անվստահությունը, խորանալու է ջավախահայության մեկուսացումը պետական ինստիտուտներից»:
Այս ամենից խուսափելու համար Սամցխե-Ջավախքի եւ Քվեմո-Քարթլիի հայկական հասարակական կազմակերպությունների խորհուրդը պահանջ է ներկայացրել վրացական իշխանություններին, որ վերջիններս զերծ մնան իրենց ծրագրերի հանդեպ երկակի ստանդարտների կիրարկումից եւ նման գործընթացներ սկսելու շրջանակներում շուտափույթ ձեռնամուխ լինեն խնդրո առարկա տարածաշրջանում հայերենին տարածաշրջանային կարգավիճակ շնորհելուն:
