Գյումրու քաղաքապետարանում սկսում է ներդրվել քաղաքացիների դիմումների շրջանառության էլեկտրոնային համակարգըՙ «մեկ պատուհանի» սկզբունքը: Մինչեւ այժմ հանրապետության բազմաթիվ պետական հիմնարկներում կիրառություն գտած այս համակարգը, պատասխանատուների հավաստմամբ, մի շարք առավելություններ է տալիս, ամենակարեւորըՙ վերահսկելի է դարձնում յուրաքանչյուր փաստաթղթի շրջանառությունը, որին համացանցով կարող է հետեւել դիմումատուն ինքը, բացի այդ քաղաքացիները չեն շփվում բաժինների պաշտոնյաների հետ, ինչը նվազեցնում է կոռուպցիոն ռիսկերը: Դիմումին օրենքով սահմանված ժամկետում չպատասխանելու դեպքում պաշտոնյան պատասխանատվության կենթարկվի:
Հերթերից խուսափելու համար ներդրվել է նաեւ հերթերի կառավարման էլեկտրոնային համակարգը, քաղաքացիներին տրամադրվելու են դիմումների օրինակելի ձեւաթղթեր:
Քաղաքապետ Սամվել Բալասանյանը նշել է, որ գործընթացը վերահսկվելու է անձամբ իր կողմից: «Հիմա փորձնական շրջան է, մինչեւ հունվար,- ասել է նա- կարող են լինել ինչ-ինչ թերացումներ, քանի որ բաժինները նոր են սովորում այս կերպ աշխատել: Բայց տարվա սկզբից արդեն ամբողջովին կունենանք մեկ պատուհանի սկզբունքը»: Դրա համար քաղաքապետարանի աշխատակիցները նաեւ համապատասխան դասընթաց են անցնելու:
