Վան Գոգի նորահայտ գլուխգործոցը կոչվում է «Արեւամուտը Մոնմաժուրում». նկարը պարզվում է երկար տարիներ մնացել է անհայտ, գտնվելով նորվեգացի կոլեկցիոների խորդանոցի փոշիների մեջ: Կտավը նա ձեռք է բերել 1908-ին, սակայն դա չի զարդարել իր տունը, որովհետեւ նա համոզված է եղել, որ օրիգինալը չէ, տեղեկանում ենք euronews.com կայքից:
Ամստերդամի Վան Գոգի թանգարանի համար, որը հոլանդացի մեծ վարպետի նորահայտ կտավը հանրությանը կներկայացնի սեպտեմբերի 24-ին, նման մասշտաբի ցուցադրությունը բացառիկ երեւույթ է, նախադեպը չունեցող: Ինչպես նկատել է թանգարանի տնօրեն Ակսել Ռուգերը, այդ նկարը նոր էջ է բացում Վան Գոգի ստեղծագործության մեջ:
Բացառիկ է նաեւ այն հանգամանքը, որ կտավը պատկանում է նկարչի ստեղծագործական վերելքի շրջանին, երբ Վան Գոգը ապրում եւ աշխատում էր Ֆրանսիայի հարավում, նշանավոր Առլում, երբ ստեղծվել են նրա հանճարեղ «Արեւածաղիկները», «Դեղին տունը» եւ այլ գործերը:
Համոզվելու համար կտավի պատկանելությանը Վարպետի վրձնին, մասնագետները տեւական եւ հանգամանալի աշխատանք են տարելՙ նկարչի ոճի, օգտագործած տեխնիկայի, գույնի համեմատության, արվել է ռենտգենյան լուսանկար, կտավի համակարգչային անալիզ, Վան Գոգի նամակների նորովի ընթերցում:
