Սեպտեմբերի 10-ին Հայաստանի պետական երիտասարդական նվագախմբի նոր համերգաշրջանը մեկնարկեց հանրահայտ դաշնակահարուհի Ջուլիա Զիլբերքվիթի (ԱՄՆ) հետ համատեղ համերգով:
Աշնանային համերգաշրջանի բացման առաջին համերգին հնչեցինՙ Սերգեյ Սլոնիմսկի, «Հրեական ռապսոդիա». կոնցերտ դաշնամուրի, լարայինների, ֆլեյտայի եւ հարվածայինների համար, Պյոտր Իլյիչ Չայկովսկի Սիմֆոնիա թիվ 4, երկ 36 ֆա մինոր:
Հայաստանի պետական երիտասարդական նվագախմբի գեղարվեստական ղեկավար եւ գլխավոր դիրիժոր Սերգեյ Սմբատյանն իր ուրախությունը հայտնեց մենակատարի` Ջուլիա Զիլբերքվիթի հետ համագործակցության առթիվ:
Ս. Սմբատյանի հավաստմամբ, 2013-14թթ. համերգաշրջանը լինելու շատ բովանդակալի լի անակնկալներով. կան միջազգային պայմանավորվածություններ, Հայաստան կժամանեն հանրահայտ մենակատարներ: Բացի այդ, նոր համերգաշրջանում երիտասարդական նվագախումբը հրավիրված է լավագույն փառատոների ու գործակալությունների կողմից:
Համերգից առաջ Ջուլիա Զիլբերքվիթը հանդես եկավ մամուլի ասուլիսով, որի ընթացքում ընդգծեց, որ տպավորված է Երեւանով, որտեղ առաջին անգամ է գտնվում:
Նշենք, որ Ջուլիա Զիլբերքվիթն առաջին անգամ չէ, որ Հայաստանի պետական երիտասարդական նվագախմբի հետ ելույթ է ունենում, մինչ այս` անցած տարի համերգային ծրագրով հանդես է եկել Օդեսայում. «Նվագախումբն ուղղակի հրաշալի է, մենք կատարել ենք շատ բարդ ստեղծագործություններ: Ելույթ եմ ունեցել շատ դիրիժորների հետ: Կան դիրիժորներ, որոնք այնքան էլ շատ չեն սիրում նվագել մենակատարների հետ, սակայն Սերգեյ Սմբատյանը միշտ մեր կողքին է եւ շատ լավ հարաբերությունների մեջ եմ իր հետ»:
Ջուլիա Զիլբերքվիթն ուրախությամբ լրագրողներին ասաց, որ Երիտասարդական նվագախումբը շատ լավ, պրոֆեսիոնալ կոլեկտիվ է եւ շատ աշխատասեր. «Երբեք չեն նեղսրտում, երբ նրանց խնդրում ես ինչ-որ բան եւս մեկ անգամ կրկնել: Երիտասարդական էներգիա եմ ստանում այս նվագախմբի հետ աշխատելիս»: Դաշնակահարուհին տեղեկացրեց նաեւ, որ կոմպոզիտոր Սերգեյ Սլոնիմսկին շատ ուրախ է «Հրեական ռապսոդիայի» հայաստանյան պրեմիերայի համար:
Հատկանշական է, որ Ջուլիա Զիլբերքվիթը ծանոթ է հայկական երաժշտությանը ու շատ է սիրում Արամ Խաչատրյանի ստեղծագործությունները. «Արամ Խաչատրյանի գործերը մեր ռեպերտուարի մասն են կազմում, այնպես, ինչպես Բախը, Մոցարտը, Շոստակովիչը: Ես չգիտեմ որեւէ երաժշտի, որ ստանալով մասնագիտական կրթություն դպրոցում եւ կոնսերվատորիայում, չնվագի Խաչատրյանի գործերից որեւէ մեկը»:
Դաշնակահարուհի Ջուլիա Զիլբերքվիթը տեղեկացրեց նաեւ, որ Նյու Յորքում բազմիցս է մասնակցել Հայոց ցեղասպանության եւ Հոլոքոստի հիշատակին նվիրված համերգներին, որոնք արդեն ավանդույթ են դարձել եւ 10-15 տարի անցկացվում են աշնան ամիսներին: Դաշնակահարուհին նշում է, որ երկու ազգերի այդ մեծ վիշտը համախմբում է մարդկանց:
Նվագախմբին համերգաշրջանի բացման առթիվ շնորհավորելու էր եկել նաեւ կոմպոզիտոր Տիգրան Մանսուրյանը, որն ընդգծեց. «Հայաստանի պետական երիտասարդական նվագախմբի ելույթները երիտասարդական ոգի են բերում մեծ արժեքներին: Շատ ուրախ եմ մեր երիտասարդների աշխատասիրության, նվիրվածության համար»:
