«Չայնա-Հայ» անունով ճանաչված Չինաստանի հայկական համայնքի ներկայացուցիչներ Գուանգժուում հավաքվել են վերջերսՙ ըմբոշխնելու չինաստանաբնակ Ջեկ (Հակոբ) Մաքսյանի եւ Երջո Սամուելյանի հովանավորությամբ Կանադայից հրավիրված Արթուր Աբգարյանի եւ նրա նվագախմբի համերգը, տեղեկացնում է «Արմինյն Միրոր-Սփեքթեյթր» շաբաթաթերթը: Ներկաները նաեւ ուրախությամբ ողջունել են Հոնկոնգում հայկական համայնքային կենտրոն բացելու լուրը: Դա լինելու է առաջին հայկական կենտրոնը այդ հսկայական երկրում եւ ծառայելու է որպես հավաքավայր պատմամշակութային միջոցառումների համար: Բացի Չինաստանի տարբեր քաղաքներից եկած ծնունդով հայերիցՙ կենտրոնը նաեւ հնարավորություն է տալու չինացիներին ավելի մոտիկից ճանաչելու հայերին եւ Հայաստանին:
Վերոնշյալ երաժշտական երեկոյից եւ արեւելյան ռեստորանում հյուրասիրությունից հետո արդեն 35 տարի Չինաստանում եւ Հոնկոնգում բնակվող Մաքսյանը խոստովանել է, որ «իր կյանքի ամենահուզիչ պահերն է ապրել», եւ խոստացել է նման միջոցառումներ կազմակերպել նաեւ ապագայում:
Իսկ Արթուր Աբգարյանն ավելացրել է. «Երբեք չէի պատկերացնում, որ Չինաստանի հայկական համայնքում կան հայկական ոգով ապրող եւ ստեղծագործող հայ երիտասարդներ, որոնք Հայաստանից հեռու փորձում են հայկական խանդավառ մթնոլորտ ստեղծել: Ես պարզապես սիրահարվեցի այս համայնքին»:
