Իշխող «Ենի Ազարբայջան» կուսակցության գործադիր քարտուղարի տեղակալ, Միլլի մեջլիսի պատգամավոր Մուբարիզ Գուրբանլին երեկ լրագրողներին ասել է, որ նախագահի ընտրության հետ կապված «քարոզչական միջոցառումները կսկսվեն սեպտեմբերի 18-20-ին»: Կուսակցությունը նախատեսում է ի պաշտպանություն Իլհամ Ալիեւի թեկնածության գրանցման «հավաքել ավելի քան մեկ միլիոն ստորագրություն», երբ օրենքով այդ թիվը 40 000 է:
Գուրբանլիի ասելով, Ադրբեջանում «բոլոր ընտրություններն աչքի են ընկել ընտրողների ակտիվ մասնակցությամբ»: Նա նաեւ որոշակի կանխատեսումներ է արել, թե ովքեր են քվեարկելու Իլհամ Ալիեւի օգտին:
Առաջին հերթին նա նշել է «Ենի Ազարբայջան» կուսակցության ավելի քան 600 000 անդամներին, որ «թեկնածու են առաջադրել Իլհամ Ալիեւին»: Գուրբանլին կարծում է, որ Իլհամ Ալիեւի օգտին քվեարկելու են նաեւ այլ կուսակցությունների անդամներ, միլիոնավոր անկուսակցականներ, որ «պաշտպանում են Իլհամ Ալիեւի քաղաքականությունը»:
Ամենահետաքրքրական հաշվարկը, որ հնչեցրել է իշխող կուսակցության գործադիր քարտուղարի տեղակալը, վերաբերել է ընդդիմադիր ընտրազանգվածին: Նրա գնահատմամբ, կատարված ուսումնասիրությունները «ցույց են տվել, որ արմատական եւ կառուցողական ընդդիմության համակիրների ընդհանուր թիվն ավելին չէ, քան բոլոր ընտրողների առավելագույնը 4 տոկոսը»:
Ըստ այդմ, հոկտեմբերին կայանալիք նախագահական ընտրություններում Իլհամ Ալիեւը «կստանա ընտրողների ձայների 96 տոկոսը»: Ավելի վաղ, մինչդեռ, «Ենի Ազարբայջանի» գործադիր քարտուղար Ալի Հասանովը վստահեցրել էր, որ «Իլհամ Ալիեւը նախընտրական քարոզչություն չի անի, դրա կարիքը չկա, քանի որ նրա փոխարեն խոսում են իր կատարած գործերը»:
Մինչ իշխանություններն արդեն իսկ տոնում են Իլհամ Ալիեւի «համոզիչ հաղթանակը», ընդդիմությունը երեկ Մոսկվայում եւ Բաքվում երկու միջոցառում է անցկացրել: ՌԴ մայրաքաղաքում կինոռեժիսոր Ռուստամ Իբրահիմբեկովը հանդիպել է Ռուսաստանի, Եվրոպայի եւ Թուրքիայի «ադրբեջանական համայնքների ներկայացուցիչների հետ»:
Վերջիններս հավաստիացրել են, որ ընտրություններում «կպաշտպանեն Իբրահիմբեկովի թեկնածությունը»: Իսկ Բաքվում այսպես կոչված Ժողովրդավարական ուժերի ազգային խորհրդի «Ղարաբաղի հարցով հանձնաժողովը» գումարել է անդրանիկ նիստը: Հանձնաժողովը գլխավորում է պատմաբան Ջամիլ Հասանլին:
Նա իշխանություններին մեղադրել է «Ղարաբաղի հարցը բացառապես նախագահի վերահսկողությանը թողած լինելու» համար եւ ասել, որ «հասարակությունը ոչ մի տեղեկություն չունի բանակցությունների ընթացքից»: Հասանլին նաեւ խստագույնս դատապարտել է ադրբեջանական հեռուստաընկերությունների գործունեությունը, որոնք «տեսասփռում են այնպիսի հաղորդումներ եւ ծրագրեր, որոնք բարոյազրկում են մարդկանց, նպաստում, որ ժողովուրդը մոռանա Ղարաբաղի խնդիրը»:
«Այդ նպատակն են հետապնդում նաեւ միջազգային կառույցները, որոնց ցանկությունն է, որ ադրբեջանական հասարակությունը հաշտվի ներկա դրության հետ»,- պնդել է Ջամիլ Հասանլին: Նա ասել է, որ իրենք «ձեռնամուխ են եղել ԼՂ խնդրի կարգավորման հայեցակարգի մշակմանը», սակայն որեւէ մանրամասնություն չի փոխանցել: Ժողովրդավարական ուժերի ազգային խորհրդի կազմավորմանը հաջորդած ամբողջ ժամանակաշրջանում իշխանահաճ լրատվամիջոցներն ու քաղաքական շրջանակները Ռուստամ Իբրահիմբեկովի հասցեին հնչեցնում են քննադատություն, որ նա «Ղարաբաղի հարցում տեսակետ չի արտահայտում»:
Վերջին հարցազրույցներից մեկում Իբրահիմբեկովը կարծիք էր հայտնել, որ «Լեռնային Ղարաբաղը ոչ միայն տարածք է, այլեւ այնտեղ ապրող հայ բնակչություն», ինչի առթիվ արժանացել էր «հայամետ գործիչ» որակման: Կարելի է ենթադրել, որ Մուբարիզ Գուրբանլիի նշած թվերը նկարելու համար իշխանություններն ավելի են սաստկացնելու հակահայ քարոզչությունը եւ պատերազմական հռետորաբանությունը, որպեսզի նկատել տրվի, թե «Ղարաբաղի հարցում ժողովուրդի եւ Իլհամ Ալիեւի մոտեցումները նույնական են»:
