Կազանում ընթացող համաշխարհային ուսանողական խաղերում Հայաստանին 3-րդ մեդալը պարգեւեց ազատոճային ըմբիշ Դավիթ Սաֆարյանը: Մինչեւ 66 կգ քաշային կարգում Դավիթը հաջող անցկացրեց նախնական փուլերի գոտեմարտերն ու մտավ եզրափակիչ: Նա հաջորդաբար պարտության մատնեց լեհ Արկադիուշ Սժելային, ուզբեկ Իխտիեր Նավրուզովին, Ղրղզստանի ներկայացուցիչ Ուլուկման Մամատովին եւ ուկրաինացի Սեմյոն Ռադուլովին:
Վճռորոշ գոտեմարտում Դավիթի մրցակիցը ռուսաստանցի Մագոմեդ Կուրբանալիեւն էր: Հայ ըմբիշը եզրափակիչում պարտվեց 1-3 հաշվով եւ բավարարվեց արծաթե մեդալով:
Մինչեւ 84 կգ քաշային կարգում Մուսա Մուրթազալիեւն առաջին գոտեմարտը ճապոնացի Մաոյա Ակագումայից շահելուց հետո հաջորդ մրցամարտում պարտվեց իրանցի Մոհամադհոսեյին Մոհամադիանին եւ դուրս մնաց հետագա պայքարից: Անհաջող հանդես եկավ նաեւ Գարիկ Բարսեղյանը, որը մինչեւ 55 կգ քաշային ըմբիշների մրցավեճում հենց առաջին գոտեմարտից թողեց ասպարեզը: Նրա մրցակիցը վրացի Օթարի Գոգավան էր:
Անհաջող հանդես եկան նաեւ Վոլոդյա Ֆրանգուլյանը (60 կգ) եւ Էդգար Ենոքյանը (96 կգ), որոնք եւս առաջին գոտեմարտերից հետո դուրս մնացին հետագա պայքարից. Ֆրանգուլյանը պարտվեց ամերիկացի Թիլեր Գրաֆին, իսկ Էդգարը զիջեց ադրբեջանցի Գաջի Շարիպովին:
