Ռուսաստանի Դաշնության սպառողների իրավունքների պաշտպանության պետական վերահսկողության ծառայության («Ռոսգոսնադզոր») պետ Գենադի Օնիշչենկոն «Ինտերֆաքսին» տված հարցազրույցում ասել է, որ Ուկրաինայից Ռուսաստան ներմուծվող քաղցրավենիքի որակը լուրջ տագնապ է հարուցում: «Վերջին ժամանակներս ծառայության շատ ավելի լուրջ մտահոգությունն է առաջացնում Ուկրաինայից Ռուսաստան ներմուծվող հրուշակեղենի որակը: Առաջին հերթին, խնդիրներ է առաջացնում «Ռոշեն» (Roshen) ընկերության արտադրանքը», նշել է նա:
Տեղեկացնենք, որ «Ռոշեն» ընկերության արտադրանքը ներմուծվում եւ վաճառվում է նաեւ Հայաստանում: Ռուսաստանի համապատասխան ծառայության հայտարարությունից հետո ուկրաինական այս ընկերության քաղցրավենիքի որակի վերաբերյալ Հայաստանի սննդամթերքի անվտանգության պետական ծառայությունը որեւէ ասելիք չունի՞, եւ ընդհանրապես վատ չէր լինի, որ այս ծառայությունը գոնե մեկ-մեկ զբաղվեր նաեւ ներմուծվող ապրանքների որակի խնդիրներով, իսկ մեր օտարամոլ սպառողներն էլ տեղեկանային իրենց սիրելի արտադրանքի որակի մասին հնչող մտահոգություններին:
