Երեկ տեղի ունեցած ՀՀԿ գործադիր մարմնի նիստում որոշում է կայացվել հրաժարական տված Սյունիքի մարզպետ Սուրիկ Խաչատրյանի փոխարեն Սյունիքի մարզպետի պաշտոնում առաջադրել Ազգային ժողովի պատգամավոր, ՀՀԿ խորհրդի անդամ Վահե Հակոբյանի թեկնածությունը: Առաջարկը ներկայացրել է նախագահ Սերժ Սարգսյանը, խորհուրդն այն ընդունել է միաձայն: Այս լուրը լրագրողներին ներկայացրած ՀՀԿ մամլո խոսնակ Էդուարդ Շարմազանովը համոզված էր, որ Վահե Հակոբյանը շատ արդյունավետ կաշխատի այդ պատասխանատու պաշտոնում, քանի որ պատգամավորական աշխատանքի փորձ ունի, տնտեսական գիտությունների թեկնածու է եւ վայելում է սյունեցիների հարգանքն ու սերը: Այս մասով փաստորեն վերջ դրվեց Սյունիքի մարզպետացուների անունների շրջանառությանը մամուլում, սակայն, համենայնդեպս, Վահե Հակոբյանի անունը շրջանառվել էր դրանց թվում:
Ինչ վերաբերում է Վերահսկիչ պալատի զեկույցի ժամանակ Ազգային ժողովում մեծամասնության պահվածքի քննարկմանը, որի մասին հայտնի խորհրդակցության ժամանակ ասել էր նախագահ Սարգսյանը, երեկ այդ մասին եւս քննարկվել էր, ու ԳՄ-ն հանգել էր եզրակազության: Բայց որոշման բովանդակությունը լրագրողներն ինչ արեցին-չարեցին` չիմացան: Շարմազանովն ասում էր, որ որեւէ նկատողության, պաշտոնանկության թեմա չի քննարկվել: Լուրջ բովանդակային քննարկումներ են եղել եւ մի արդյունքի են եկել:
Հովիկ Աբրահամյանի` ԱԺ-ում ՎՊ հաշվետվության վերաբերյալ արված արտահայտությունների վերաբերյալ, թե թալանել են, եւ Շարմազանովն էլ երկրորդել է, Է. Շարմազանովը հերքեց, թե ինքը թալանի մասին է խոսել, բայց որ չիրականացված աշխատանքի համար պաշտոնյաները պետք է պատժվեն, դա ասել է եւ ասում է: Եւ դա պետք է տեղի ունենա քրեական պատասխանատվությունների ճանապարհով: Կուսակցության դիրքորոշումը եղել եւ մնում է հստակ` օրենքի խախտումը պետք է պատժվի: Իսկ իրավական գնահատականների համար կա դատարան, եթե քննությունը պարզի, որ մարդիկ մեղավոր են, կպատժվեն: Դե իսկ ՀՀԿ գործադիր մարմնի համար ամեն ինչ պարզ է եղել երեկ եւ եկել են ընդհանուր հայտարարի:
Ինչպես միշտ` ԳՄ նիստից հետո հասանելի էր Աժ նախագահ Հովիկ Աբրահամյանը : Նա նշեց, որ որեւէ գնահատական չի եղել նիստին, որոշում է կայացվել ուղղակի: «Ձեր ցանկությունը չիրականացավ», կատակեց նա` լրագրողներին դիմելով: Հարցին, թե նրա հրաժարականը հնարավո՞ր է եւս մեկ անգամ, պատասխանեց, որ նման հարց չի քննարկվել: Վարչապետի անձի շուրջ օֆշորային սկանդալին չի հավատում: Իր եւ վարչապետի հարաբերությունները լարվա՞ծ են. «Եթե մամուլին նայենք` այո, իրականում` ոչ», ասաց: Նախագահի հայտնի ելույթը խորհրդակցության ժամանակ չի կարծում, թե կոշտ էր: Եղել է ՎՊ հաշվետվություն, ինքը տպավորություն է ուղղել ՎՊ նախագահին, բայց քննարկումներից հետո ամփոփիչ ելույթ է ունեցել ու շատ հստակ գնահատականներ է տվել: Իսկ ահա նման դեպքերում ինչպես վարվելու վերաբերյալ էլ երեկ ՀՀԿ ԳՄ-ն որոշում է կայացրել: Հնարավո՞ր է, որ Իշխան Զաքարյանը հրաժարական ներկայացնի: Նման հարց կուսակցությունում չի քննարկվել, բայց «Երբեք մի ասեք երբեք», ասաց ԱԺ նախագահը: «Սլաքները Ձեր դե՞մ էին ուղղված ԳՄ նիստում», հարցն ուրիշ կերպ հնչեցրին լրագրողները: «Ոչ մի սլաք ուղղված չէ իմ դեմ, բացի մամուլի սլաքներից», ասաց:
Իսկ որ Հ. Աբրահամյանի ազգականը քվոտայի դիզվառելիք էր ձեռքբերել` այս հարցին Հ. Աբրահամյանը չխուսափեց մեկնաբանություն տալ: Դիզվառելիքը եղել է բոլոր հողօգտագործողների համար: Որեւէ սահմանափակում, թե անապահով խավի համար է, չի եղել: Քաղաքական ենթատեքստ չուզեց տեսնել այդ բոլորում, չուզեց ոչ մեկին մեղադրել, բայց եւ նշեց, թե իրականություն է, որ իր հարազատները վճարել եւ օգտվել են դիզվառելիքից: «Իսկ եթե իմ ազգականներն իրավունք չունիեին օգտվելու, պետք է գրեին, որ Աբրահամյանի բարեկամներն իրավունք չունեին օգտվելու», ասաց ԱԺ նախագահը եւ ավելացրեց, որ ոչ մեկից չի վիրավորվում, այլ միայն պատվեր կատարելու համար է վիրավորվում:
