Հայաստանի ազգային հավաքականի կիսապաշտպան Արաս Օզբիլիսն արձակուրդից հետո միացել է Կրասնոդարի «Կուբանի» իր խաղընկերներին, որոնք ուսումնամարզական հավաք են անցկացնում Ավստրիայում: Արասը հարցազրույց է տվել ակումբի պաշտոնական կայքին:
– Արաս, ինչպե՞ս հասար Բադ-Տատցմանսդորֆ:
– Ամստերդամից մեկնեցի Վիեննա, որտեղ ինձ դիմավորեցին ակումբի ներկայացուցիչները: Ընթրիքին արդեն հյուրանոցում էի: Հաճելի է կրկին գտնվել այն մարդկանց շրջապատում, ում հետ հիանալի մրցաշրջան անցկացրինք: Այժմ պատրաստվում ենք նոր մրցաշրջանին, որում հույս ունեմ, որ ավելի հաջող հանդես կգանք:
– Արձակուրդդ որտե՞ղ անցկացրիր:
– Ընտանիքիս հետ մնացինք Ամստերդամում: Նույնիսկ չէի ծրագրել որեւէ տեղ մեկնել, քանի որ ժամանակը քիչ էր:
– Քեզ երկրպագում էինք Հայաստանի հավաքականի հանդիպումների ժամանակ: Հայերը 2 անգամ զարմացրին բոլորին, նախ տանը պարտվեցին Մալթային, ապա հյուրընկալվելիս ջախջախեցին Դանիային:
– Պատասխանս յուրօրինակ չէ. սա ֆուտբոլ է: Մալթայի հավաքականն արագ գոլ խփեց ու պահպանեց հաղթական հաշիվըՙ ամբողջ թիմով հուսալիորեն պաշտպանվելով: Իսկ մենք ոչ մի կերպ չէինք կարողանում գնդակն ուղարկել մրցակցի դարպասը: Նման բան պատահում է նույնիսկ ավելի տիտղոսակիր թիմերի հետ: Փոխարենը Կոպենհագենում շատ համախմբված հանդես եկանք: Դաշտի տերերը թերեւս մինչեւ հանդիպումն իրենց հաշվին արդեն 3 միավոր էին գրանցել: Հաճելի է, որ հաղթանակում նաեւ իմ ներդրումը կար: Ճիշտ է, Մալթայի հավաքականի հետ խաղում ձախողվեցինք: Սակայն այսօր Հայաստանի հավաքականն ունակ է ուժեղ մրցակիցներին հաղթելու:
– «Կուբանի» զբաղեցրած 5-րդ տեղը ՌԴ առաջնությունում հանգամանքների հաջող դասավորման արդյո՞ւնք է:
– Ես այդպես չեմ կարծում: Ավելի շուտ մենք միավորներ կորցրինք, քան հավաքեցինք: Շատերն այն կարծիքին էին, որ առաջնության գարնանային հատվածում «Կուբանի» համար խաղացանկն անհաջող է կազմված: Եվ ի՞նչ. մենք այդ փուլում ոչ մի պարտություն չկրեցինք:
– Նախապատրաստական շրջանում թիմի մի քանի ֆուտբոլիստներ հեռացան «Կուբանից»: Որքանո՞վ դա կազդի թիմի ելույթների վրա:
– Մշտապես ափսոսում ես, որ թիմից հեռանում են ֆուտբոլիստներ, որոնց հետ հաջողության ես հասել: Սակայն ֆուտբոլում դա անխուսափելի է: Կորուստները նվազագույնն են, բացի այդ պահեստայինների թվում կան ուժեղ ֆուտբոլիստներ:
– Այս տարի «Կուբանը» մասնակցելու է նաեւ եվրոգավաթների խաղարկությանը: Նշանակում է, որ հարկավոր է պայքարել մի քանի ֆրոնտով:
– Այդ հարցը բոլոր թիմերն էլ պետք է լուծեն: «Կուբանը» ներկայումս առաջադիմում է եւ վստահ եմ, որ հիմնախնդիրները հաջողությամբ կլուծվեն:
– Ի՞նչ ակնկալիքներ ունես մրցաշրջան 2013/14-ից:
– Նույնը, ինչ որ «Կուբանի» ֆուտբոլասերները: Սպասում եմ նոր հաղթանակներ եւ թիմային նոր ռեկորդների գրանցում:
