Հենրիխ Մխիթարյանի տեղափոխությունը «Լիվերպուլ» հավանաբար չկայանա: Ըստ բրիտանական Mirror-ի, հունիսի 21-ին Հենրիխ Մխիթարյանը պետք է բուժզննում անցներ «Լիվերպուլում», սակայն դա տեղի չի ունենա: Այդ օրը բուժզննում կանցնի միայն «Սեւիլիայի» 20-ամյա հարձակվող Լուիս Ալբերտոն, որը կդառնա Բրենդան Ռոջերսի թիմի հերթական նորեկը: Թերթի կարծիքով, տրանսֆերային գործարքը կարող է ձախողվել, քանի որ ՀՀ հավաքականի ֆուտբոլիստի տրանսֆերային իրավունքների միայն 50 տոկոսն է պատկանում «Շախտյորին»:
Sports.ru-ն էլ նշել է, որ ակումբները չեն համաձայնվում տրանսֆերային գումարի վճարման ժամկետների շուրջը: «Լիվերպուլը» պատրաստ է 20 մլն ֆունտ ստեռլինգը 2 տարում մաս-մաս վճարել, իսկ «Շախտյորը» դրան համաձայն չէ:
Եվ իրոք, «Շախտյորին» այնքան էլ ձեռնտու չէ Մխիթարյանից հրաժարվել առավելագույնը 15 մլն եվրոյի դիմաց (պայմանագրով նշված 30 մլն եվրոյի 50 տոկոսը): Չէ՞ որ Դոնեցկի «Մետալուրգին» հայ ֆուտբոլիստի տեղափոխության դիմաց «Շախտյորը» 7,5 մլն եվրո էր վճարել:
«Շախտյորի» գլխավոր տնօրեն Սերգեյ Պալկինն էլ հայտարարել է, որ ակումբը մերժել է «Լիվերպուլին» եւ Մխիթարյանը հունիսի 23-ին միանալու է թիմակիցներին, որոնք ներկայումս ուսումնամարզական հավաք են անցկացնում Ավստրիայում: Պալկինի խոսքերն ավելի հավաստի են թվում, երբ «Սպորտ Էքսպրեսի» թղթակից Արթուր Պետրոսյանը տեղեկացրեց, որ Մխիթարյանը ոչ թե Լոնդոն է մեկնել, ինչպես երեկ նշել էր PanARMENIAN.Net-ը, այլ «Ավստրիական ավիաուղիներով» մոր եւ քրոջ հետ մեկնել է Վիեննա:
Ինչ խոսք, ցավալի կլինի, եթե գործարքը տեղի չունենա: Դա կարող է հոգեբանական մեծ հարված լինել Մխիթարյանի համար, որը մեծ ցանկություն ունի տեղափոխվելու եվրոպական առաջատար ակումբ: Ուստի չի բացառվում, որ նա «Շախտյորում» ելույթները հարկադրաբար շարունակելու դեպքում նույնպիսի նվիրվածությամբ չգործի:
