ՏԱՐԵԿԱՆ 1000 ՄԱՍՆԱԳԵՏԻ ՊԱՀԱՆՋԱՐԿ 10-15 ՏՈԿՈՍ ԱՃ ՈՒՆԵՑՈՂ ՈԼՈՐՏԻ ՀԱՄԱՐ
Երեւանում բացվեց տեղեկատվական տեխնոլոգիաների «ԴիջիԹեք» բիզնես ֆորումը
Երեւանում երեկ բացված «Խելացի լուծումներՙ խելացի երկրների համար» խորագրով «ԴիջիԹեք» բիզնես ֆորումին մասնակցում էին 62 կազմակերպություններ, 43-ը տեղական, մյուսներըՙ ամերիկյան, ռուսական, սինգապուրյան, վրացական, իտալական, ուկրաինական եւ այլ ընկերություններ: Ֆորումի բացմանը ելույթ ունեցավ վարչապետ Տիգրան Սարգսյանը :
Վարչապետը ակնառու համարեց այս ոլորտում մասնավոր հատվածի հետ կատարված աշխատանքների արդյունքները, արձանագրելով տեղեկատվական տեխնոլոգիաների (ՏՏ) ոլորտում ահռելի առաջընթացը, որը «առաջընթաց է նաեւ միջազգային համեմատությունների մեջ»: Ըստ Տիգրան Սարգսյանի, դրա վառ վկայությունն է նաեւ այն հանգամանքը, որ համաշխարհային ճանաչում ունեցող ընկերությունները հենց Հայաստանի Հանրապետությունում են տեղակայում իրենց տարածաշրջանային կենտրոնները: Վարչապետի կարծիքով, դրան մեծապես նպաստում են նաեւ ԱՄՆ-ումՙ Սիլիկոնյան հովտում անցկացվող ֆորումները, մեր երկրին հնարավորություն տալով ուղղակի կապ հաստատելու աշխարհի առաջատար ընկերությունների հետ:
Տիգրան Սարգսյանի խոսքերով, տարեկան 10-15 տոկոս աճ ապահովող ՏՏ ոլորտը կառավարության առջեւ դնում է կադրերի պատրաստման խնդիր, որպեսզի բուհերը կարողանան տարեկան առնվազն 1000 մասնագետ մատակարարել այս ոլորտին, ինչը կառավարության առաջնահերթություններից մեկն է: Այնուհետեւ վարչապետը հիշատակեց ձեռնարկությունների պետական ռեգիստրում եւ կադաստրի համակարգում տեղեկատվական տեխնոլոգիաների ներդրումը եւ դրանց արդյունավետությունը, տեղեկացրեց, որ ՏՏ-ի լայնածավալ կիրառում է սկսվել հարկային եւ մաքսային բնագավառում` կրճատելով հարկ վճարողների շփումը այս ոլորտի աշխատողների հետՙ նվազեցնելով կոռուպցիոն ռիսկերը, ապա նաեւ համակարգը դարձնելով թափանցիկ եւ վերահսկելի:
«Բարձր արտադրողականության, բազմաֆունկցիոնալ շուրջ 7500 ՀԴՄ-ներ, որոնք ունեն հսկողական բարձր հնարավորություններ, թույլ են տալիս ոչ միայն իրականացնել հաշվառում, ստանալ հաշվետվություններ, այլեւ քարտային վճարումներ, հուլիսի 1-ից առաջին հերթին կտրամադրվեն խոշոր բիզնեսին», այս մասին իր ելույթում հայտնեց Տիգրան Սարգսյանը, ավելացնելով, որ 2014-ի հունվարի մեկից 60 հազար փոքր եւ միջին ձեռնարկություններ եւս հնարավորություն կունենան օգտվելու այդ ՀԴՄ-ներից, ինչն էապես կբարելավի վարչարարությունը հարկային եւ մաքսային ոլորտում: Ելույթի վերջում նա հավաստիացրեց, որ ՏՏ ոլորտը կառավարության առաջնահերթություններից մեկն է:
Հայաստանում ԱՄՆ դեսպան Ջոն Հեֆերնը հիշեցրեց, որ նախորդ տարի ինքը վարչապետ Սարգսյանի հետ ԱՄՆ-ում մասնակցել է «ԱրմԹեք» համաժողովին եւ նշել, որ այդ համաժողովը ամերիկյան եւ հայկական ընկերությունների սերտ համագործակցության լավ օրինակ է: «ԱՄՆ-ի ընկերությունները Հայաստանում բավականին ակտիվ են: Շատ կարեւոր է, որ ՏՏ ընկերությունները եւ տնտեսության մյուս ճյուղերը փոխկապակցվեն: ՏՏ ոլորտը լավ աշխատանք է կատարում, նրա արտադրության 40 տոկոսն իրացվում է երկրի ներսում, ինչը լավ ցուցանիշ է նաեւ էլեկտրոնային կառավարման առումով», ասաց դեսպանը:
