Երեկ տեղի ունեցավ «Հայոց պատմություն» առարկայի միասնական քննությունը, եւ Երեւանի թիվ 170 ավագ դպրոցում տեղակայված քննական կենտրոն այցելեց կրթության եւ գիտության նախարար Արմեն Աշոտյանը:
«Անցյալ տարի արձանագրված քննությունների հանդարտ ընթացքը մենք ամրապնդեցինք նաեւ այս տարի. եթե տարիներ առաջ հանրությունն ապրում էր ընդունելության քննություններով, ապա այսօր ծնողները համեմատաբար հանգիստ են: Թե՛ կազմակերպչական եւ թե՛ բովանդակային խնդիրներով լուրջ դժգոհություն չկա, որն էլ իր հերթին վկայում է մեր աշխատանքի դրական արդյունքի մասին: Քննությունների հաջողությունը պայմանավորված է գործընթացի նկատմամբ հանրության դրական ընկալումներով, բացասական լրահոսի շատ չնչին տոկոսով, ինչպես նաեւ դիմորդների ցուցաբերած բարձր առաջադիմությամբ», երեկ ասաց Արմեն Աշոտյանը :
Աշոտյանը նշում է, որ այս տարի արձանագրվել են մեծ քանակությամբ բարձր գնահատականներ, մասնավորապես հումանիտար առարկաներից, որն էլ նախարարին հիմք է տալիս ենթադրելու, որ շատ մասնագիտությունների գծով մրցույթը թեժ է լինելու, եւ անցողիկ միավորների շեմը կբարձրանա:
ԿԳ նախարարն ասաց, որ հաջորդ տարի ԳԹԿ-ի հետ կանցկացվեն նախապատրաստական աշխատանքներ` շտեմարանների բազան ավելացնելու եւ նրանցում որոշակի կառուցվածքային փոփոխություններ անելու կապակցությամբ: Միասնական քննությունների արդյունքներն ըստ կարգի կամփոփվեն հուլիսի 15-ին, որպեսզի տարկետման իր գործառույթը հասցնի իրականացնել նաեւ ՀՀ պաշտպանության նախարարությունը:
Արմեն Աշոտյանը հիշեցրեց, որ այն դիմորդները, որոնք ստացել են դրական գնահատականներ, սակայն առաջին հայտով չեն ընդունվել, հնարավորություն կունենան լրացուցիչ հայտով դիմելու եւ ստացած քննություններով ընդունվելու բացառապես թափուր տեղեր մնացած մասնագիտությունների գծով:
Քննության արդյունքները կհրապարակվեն 5 օր անց, իսկ քննական թեստի ճիշտ պատասխաններըՙ քննության օրը, ԳԹԿ եւ ՀՀ ԿԳՆ պաշտոնական կայքերում:
