Ուրբաթ 14 յունիսի երեկոյեան «ԱՐԱՄԷ» արուեստի ցուցասրահի Միջին Արեւելքի եւ Ծոցի երկիրներու ներկայացուցիչ Մայք Վայէճեան, Բէյրութի Թէքէեան կեդրոնի 5-րդ յարկին վրայ տեղաւորուած դահլիճի մուտքին կը դիմաւորէր արուեստասէր ընտրանին:
Հայրենի թէ սփիւռքահայ հանրաճանաչ գեղանկարիչներ, քանդակագործ Ռաֆֆի Թոքաթլեանի հետ կը ցուցադրէին իրենց եզակի ստեղծագործութիւններըՙ Համալպաշեան, Չթճեան, Ռումելեան, Ոսկանեան, Մարգարեան եւ վրձինի այլ վարպետներ, որոնք իրենց արուեստը բազմիցս ներկայացուած են Հայաստանի, Լիբանանի, Եւրոպայի եւ Ամերիկայի գեղարուեստի լաւագոյն շրջանակներուն, շնորհիւ «ԱՐԱՄԷ» արուեստի միջազգային ցուցասրահի ջանքերուն:
«Արամէական» ջերմ հիւրասիրութեան մթնոլորտի մէջՙ հիւրերն ու այցելուները մինչեւ ուշ գիշեր հիացան հայկական կերպարուեստի գլուխ-գործոցներով, որոնք արդէն մեծ ճանաչման, գովեստի եւ յարգանքի արժանացած են գեղարուեստի հայ եւ օտար շրջանակներուն կողմէ ամէնուրեք:
Լիբանանի թէ Միջին Արեւելքի համար այս քաղաքական դժուարին օրերունՙ կերպարուեստի ցուցահանդէսներ կազմակերպելը խիզախ քայլ է, սակայն անհրաժեշտ մթնոլորտը ներկայացնելու, գեղեցիկն ու մարդկայինը հրամցնելուՙ խաղաղութիւն եւ բարգաւաճում տենչացող, քաղաքակրթութիւններու օրրան Փիւնիկէ-Լիբանանի ժողովուրդին: Մանաւանդ որ մեծ թիւով լիբանանցի եւ օտարազգի գեղարուեստի սիրահարներ, արուեստաբաններ, այցելեցին այս փառաւոր ցուցահանդէսըՙ բացման առաջին օրն իսկ:
