«Ես կարծում էի, թե մեսիջները, որոնք ուղարկեցի Գյումրիից, հասանելի են բոլորին»: Սա ՀՀ ոստիկանապետ Վլադիմիր Գասպարյանի տեսակետն է Գորիսի նախկին մարզպետ Սուրեն Խաչատրյանի տան բակում վերջերս տեղի ունեցած ողբերգական պատահարի վերաբերյալ:
«Միջոցառումները չենք անցկացնում այնտեղ, որտեղ դեպք է կատարվում: Միջոցառումներն անցկացնում ենք ամբողջ հանրապետության տարածքում: Եթե ուշադիր եք ոստիկանության լրատվական ծառայությանը, մենք պարբերաբար զեկուցում ենք զենք-զինամթերք առգրավելու, հանցագործությունները բացահայտելու, թիկնազորով ման գալու մասին եւ այլն: Ինչ վերաբերում է Գորիսի կոնկրետ դեպքինՙ վատ դեպք է: Ես կարծում էի, թե մեսիջները, որոնք ուղարկեցի Գյումրիից, հասանելի են բոլորի համար: Բայց դե ազգային առանձնահատկություն է: Կարծում եմՙ մեր հասարակությունն էլ, նման մարդիկ էլ կհրաժարվեն այդ առանձնահատկությունից, եւ կարծում եմՙ կլինի բառիս բուն իմաստով ապահով եւ խաղաղ երկիր», «Արզնի» օդանավակայանի տարածքում հրամանատարաշտաբային զորավարժությունների ժամանակ երեկ ասաց ոստիկանապետըՙ հավելելով, որ գործը զինվորական դատախազության վարույթում է, եւ էթիկայի նորմի խախտում է գնահատական տալը: Հարցինՙ արդյոք հավատո՞ւմ է, որ դեպքի պահին Սուրեն Խաչատրյանը քնած է եղել, ոստիկանապետն ասաց. «Ես, ի տարբերություն ձեզ, լրագրող չեմ: Ես ՀՀ ոստիկանապետն եմ եւ չեմ կարող այդպիսի հռետորական հարցերի պատասխանել»:
Անդրադառնալով արդեն մեկ տարի հետախուզման մեջ գտնվող Աշոտ Սուքիասյանի գործին, ում նկատմամբ վերջերս նոր մեղադրանք է առաջադրվել, Վլադիմիր Գասպարյանն ասաց. «Ոչ մեկի գտնվելու վայրը Երկիր մոլորակի վրա անհայտ չի կարող լինել: Գոնե այս տարիների ընթացքում ապացուցել ենք, որ ամենահեռու երկրներից ենք բերում մեր զբոսաշրջիկ իրավախախտներին: Այստեղ ես խնդիր չեմ տեսնում: Այլ երկրների հետ գրագրությունները շատ դժվար են եւ երկար են տեւում: Եթե մենք հին, Սովետական Միության որոշ երկրների հետ ուղղակի հեռախոսային կապով կարողանում ենք խնդիրներ լուծել, այստեղ այլ պետությունների հետ աշխատելուց մենք դիվանագիտական, Ինտերպոլի եւ այլ խողովակներով ենք աշխատում, ինչն ունի իր բյուրոկրատական ձգձգման պատճառները», նշեց Վլադիմիր Գասպարյանըՙ հավելելով, որ Աշոտ Սուքիասյանին հայտնաբերելու հետ կապված խնդիրներ չունեն: Ոստիկանապետի հավաստիացմամբՙ աշխատանքներ են տարվում, ու իրենք գիտեն, թե որտեղ է Սուքիասյանը: «Բայց որ ասեմՙ վաղը կբերենք, վաղը չենք բերի: Ունենք ծանր դեպքերով հետախուզվողներ, որոնք հայտնաբերվել են այս կամ այն երկրներում, բայց մի քանի ամիս էՙ օրենքների պատճառով չենք կարողանում, իրենց օրենքների պատճառով»:
Մի քանի օր առաջ Աշոտ Սուքիասյանը բաց նամակ էր տարածել, տեղեկացնելով, որ Կիպրոսում օֆշորների հետ կապված գործին վարչապետ Տիգրան Սարգսյանն ու Արարատյան թեմի առաջնորդական փոխանորդ Նավասարդ արքեպիսկոպոս Կճոյանը որեւէ առնչություն չունեն: Սուքիասյանը խոստովանել է, որ ներկայացրել է վարչապետի եւ հոգեւորականի տվյալները, որպեսզի առավել ապահովված լինի: Հարցինՙ որքանո՞վ է հավատում Սուքիասյանի նամակին, Գասպարյանը պատասխանեց. «Ես ոստիկանապետն եմ, վաղը ինձ կմեղադրեն իմ հնչեցրած կարծիքի համար: Որպես քաղաքացի իմ համոզումն ունեմ, բայց ուսադիր կրելու պայմաններում այստեղ կանգնած իմ քաղաքացու կարծիքը թող մնա ինձ: Ինչ վերաբերում է ոստիկանության պետին, զեկուցեմ, որ գնում է նախաքննություն եւ կատարվում են բոլոր անհրաժեշտ օպերատիվ եւ քննչական միջոցառումները: Մենք մեր աշխատանքով ցույց ենք տվել, որ բաց ենք աշխատում»:
Քննչական գլխավոր վարչության հատուկ կարեւորագույն գործերով քննության վարչությունում որոշում է կայացվելՙ Աշոտ Սուքիասյանին մեղադրանք առաջադրել առանձնապես խոշոր չափերով խարդախության, խաբեության կամ վստահությունը չարաշահելու եղանակով առանձնապես խոշոր չափերի գույքային վնաս պատճառելու եւ հանցավոր ճանապրահով ստացված առանձնապես խոշոր չափերով եկամուտներն օրինականացնելու համար: Խափանման միջոց է ընտրվել կալանավորումը, հայտարարվել է հետախուզում:
