Մեկնարկել է Ա. Խաչատրյանի անվան միջազգային մրցույթի 2-րդ փուլը: Ի դեպ, առաջին փուլը հաղթահարել են 9 թավջութակահարներ Կոտսիոլիս Գիորգոս (Հունաստան), Լոմակով Գեորգի (Ուկրաինա), Նավասարդյան Միքայել (Հայաստան), Իոնիցա Անդրեյ (Ռումինիա), Պերլովա Ալեքսանդրա (Ռուսաստան), Մորոզովա Աննա (Ռուսաստան), Խաչատրյան Գայանե (Հայաստան), Սուշենկո Ելիզավետա (Ռուսաստան), Աթայան Հակոբ (Հայաստան):
Մրցույթն անցկացվում է երեք փուլով: Երկրորդ փուլի հաղթողների անունները պարզ կդառնան հունիսի 11-ին: Իսկ մրցույթի եզրափակիչ երրորդ փուլը տեղի կունենա հունիսի 13-ին Արամ Խաչատրյան համերգասրահում, իսկ արդեն հունիսի 14-ին կանցկացվի գալա համերգը, տեղի կունենա մրցանակաբաշխություն:
Արամ Խաչատրյանի անվան 9-րդ միջազգային մրցույթի ժյուրիի նախագահ Արամ Թալալյանը նշում է, որ բոլոր մասնակիցներն էլ լավ պատրաստված են, եւ թեժ պայքար է ընթանում մրցանակային տեղերի համար:
Մրցույթի երկրորդ փուլ անցած թավջութակահար, Հունաստանը ներկայացնող Գիորգոս Կոտսիոլիսը տեղեկացրեց, որ սա իր երկրորդ մրցույթն է, թավջութակ նվագում է 6 տարեկանից, մի քանի ամիս է պատրաստվում է մրցույթին եւ հույս ունի իր բոլոր ելույթները հաջող կանցնեն:
Այս տարի մրցույթն ուղղված է տաղանդավոր թավջութակահարների բացահայտմանը:
Նշենք, որ Արամ Խաչատրյանի անվան միջազգային մրցույթի կազմակերպիչներն են ՀՀ մշակույթի նախարարությունը, «Արամ Խաչատրյան» մշակութային հիմնադրամը եւ Երեւանի Կոմիտասի անվան պետական կոնսերվատորիան: Մրցույթն անցկացվում է ՀՀ նախագահի տիկին Ռիտա Սարգսյանի հովանու ներքո:
2010 թվականից մրցույթի գլխավոր գործընկերն է ԱՊՀ անդամ երկրների հումանիտար համագործակցության միջպետական հիմնադրամը:
