Արդեն հինգերորդ տարին է, ինչ հայ ռեժիսորներն ու պրոդյուսերները հնարավորություն են ունենում իրենց նախաձեռնությունները, կինոնախագծերը, նոր կինոառաջարկները, նաեւ արտադրական եւ հետարտադրական փուլերում գտնվող ֆիլմերը Հայաստանի ազգային կինոկենտրոնի նախաձեռնությամբ ներկայացնել Կաննի փառատոնում գործող տասնօրյա կինոշուկայում, որտեղ Հայաստանն ունի մշտական տաղավար:
«Կաննի կինոշուկայի հայկական տաղավարում կայացան հայ ռեժիսորների ֆիլմերի եւ կինոնախագծերի շնորհանդեսներ, ինչպիսիք են` Ջիվան Ավետիսյանի «Թեւանիկ»-ը, Մարիա Սահակյանի եւ Ջեֆ Գալուստյանի «Ֆլորիստը» հեքիաթ-նախագիծը, Ռուբեն Քոչարի «Իմ անունը Վիոլա է» եւ այլ նախագծեր», «Ազգ»-ի հետ զրույցում տեղեկացրեց Ազգային կինոկենտրոնի տնօրեն Գեւորգ Գեւորգյանը:
Ինչպես կինոկենտրոնի տնօրենը փաստեց, կինոշուկայի օրերին առանձին աշխատանքներ են տարվում մի շարք կարեւոր միջազգային նշանակության կինոկազմակերպությունների հետ համագործակցության ուղղությամբ, բացի հայկական կինոնախագծերից, ֆիլմերից եւ ծրագրերից:
Ի դեպ, ազգային կինոկենտրոնի տնօրենը նաեւ հանդիպումներ է ունեցել Յուրիմաժի, Եվրոպական աուդիովիզուալ օբսերվատորիայի, Ֆրանսիայի ազգային կինոկենտրոնի ներկայացուցիչների հետ: Աուդիովիզուալ օբսերվատորիային այժմ անդամկցում է 40 երկիր: Ըստ նախնական պայմանավորվածության, 2014թ. Հայաստանը պատրաստվում է անդամակցել Յուրիմանժին, տեղեկացրեց կինոկենտրոնի տնօրենը:
Գ. Գեւորգյանն ուրախությամբ նշեց նաեւ, որ «Համաշխարհային կինոֆոնդի» տնօրեն Դուգլաս Լայբլի հետ քննվել է «Սայաթ-Նովա» ֆիլմի վերականգնման աշխատանքների ընթացքի մասին, ապա նաեւ` վերականգնումից հետո ֆիլմը 2014թ. Կաննի կինոփառատոնում որպես համաշխարհային ճանաչում ունեցող լավագույն ֆիլմ ցուցադրելու հարցը:
Պլաններ կան նաեւ Հայաստանի եւ Ֆրանսիայի ազգային կինոկենտրոնների միջեւ վերակնքել համագործակցության պայմանագրեր:
Հատկանշական է, որ Գ. Գեւորգյանը թուրքական «Հերսեյֆիլմ» կինոարտադրող ընկերության նախաձեռնությամբ հանդիպել է թուրքական կողմի հետ` հետագա համագործակցության նպատակով:
Ինչպես նշում է Գեւորգյանը, եղել են նաեւ մի շարք կարեւոր հանդիպումներ ռուսական Ռուսիկո ընկերության ներկայացուցիչների, Վենետիկի կինոփառատոնի կինոշուկայի տնօրեն Պասկալ Դիոտի, «Քենդի Մարշալ» ամերիկյան կինոընկերության ներկայացուցիչների հետ, որը հետաքրքրված է Հայաստանում կինո նկարահանելու գաղափարով:
Հայկական մի քանի կարճամետրաժ ֆիլմեր ներկայացվել են նաեւ կարճամետրաժ ֆիլմերի արտամրցութային ծրագրում:
