Իրաքյան Քրդստանի ինքնավար շրջանի նախագահ Մասուդ Բարազանին հայտարարել է, որ Բաղդադի հետ վարվող բանակցությունների նոր փուլի ձախողման դեպքում իրաքցի քրդերը ստիպված կլինեն փնտրել Իրաքի նկատմամբ «նոր մոտեցում»: Խոսքը, անշուշտ, Իրաքի հյուսիսում քրդական անկախ պետություն հռչակելու մտադրության մասին է: Բարազանին նշել է, որ մայիսին վերսկսված բանակցությունները տարաձայնությունների հաղթահարման վերջին հնարավորությունն են:
Իրաքի իշխանությունները դժգոհ են, որ երկրի հյուսիսում գտնվող նավթի հարուստ հանքավայրերից ստացվող եկամուտները մուտք չեն գործում պետական գանձարան: Բաղդադի եւ Էրբիլի միջեւ գոյություն ունեն նաեւ տարածքային տարաձայնություններ: Իրաքյան Քրդստանը նաեւ ապաստան է դարձել վարչապետ Նուրի ալ Մալիքիի կառավարության հալածանքներին ենթարկվող անձանց համար, նշում է newsru.co.il կայքէջը:
Քրդստանում արդյունահանվող նավթի մեծ մասն առաքվում է Թուրքիա: Այդ երկրի վարչապետ Ռեջիփ Թայիփ Էրդողանը, չնայած թուրքաբնակ քրդերի նկատմամբ վարվող կոշտ քաղաքականությանը, աստիճանաբար ընդլայնում է կապերը Իրաքյան Քրդստանի ինքնավար շրջանի հետ:
Աշխարհում ապրող մոտ 25 մլն քրդերը չունեն սեփական պետություն: Քրդաբնակ տարածքներ կան Թուրքիայում, Սիրիայում, Իրանում եւ Իրաքում:
«Անկախությունը քուրդ ժողովրդի գլխավոր նպատակն է: Մենք լիիրավ ենք ունենալու սեփական պետություն: Վստահ եմ, որ միայն այդպես կարելի է լուծել քրդական հարցը», հայտարարել է Բարազանին:
