ՀՀ տնտեսության հետագա զարգացման համար կարեւոր նշանակություն ունի ֆիզիկա առարկայի դասավանդման մակարդակի բարձրացումը հանրակրթական դպրոցներում: ՀՀ մի շարք ավագ դպրոցների ֆիզիկայի ուսուցիչներ նոր հմտություններ եւ գիտելիքներ ձեռք բերեցին «Ժամանակակից ֆիզիկա. հանրամատչելիացման եւ ուսուցման հիմնախնդիրներ ու լուծումներ» գիտաժողովի ընթացքում: Գիտաժողովի աշխատանքներն ընթացան ՀՀ Գիտությունների ազգային ակադեմիայում, Ա. Ալիխանյանի անվան ազգային գիտական լաբորատորիայում, ՀՀ ԳԱԱ ֆիզիկական հետազոտությունների ինստիտուտում, Հայկական ատոմային էլեկտրակայանում, ՀՀ ԳԱԱ ֆիզիկայի կիրառական պրոբլեմների ինստիտուտում:
Հայաստանի եւ արտերկրի գիտական ու կրթական հաստատությունների գիտնականները հանդես եկան զեկուցումներով՝ նվիրված ֆիզիկայի զարգացման ժամանակակից միտումներին, ժամանակակից աստղաֆիզիկային, քվանտային ֆիզիկային, ակուստաֆիզիկային, ատոմային եւ միջուկային ֆիզիկային: Մասնակիցները ստացան վկայագրեր:
Գիտաժողովն անցկացվեց «Գիտությունը՝ հանրակրթությանը» ծրագրի շրջանակում: Նպատակն էր խթանել Հայաստանում գիտության եւ կրթության կապի ամրապնդումը:
Գիտաժողովը կազմակերպել էին ՀՀ Գիտությունների ազգային ակադեմիան, ՀՀ ԳԱԱ ֆիզիկական հետազոտությունների ինստիտուտը, ՀՀ ԳԱԱ ֆիզիկայի կիրառական պրոբլեմների ինստիտուտը:
Անտարակույս, նման գիտաժողովները կնպաստեն մասնագիտության զարգացմանը մեր երկրում:
ՍՏԵՓԱՆ ՊԱՊԻԿՅԱՆ
