Պետությունը օդից փող է ուզում բռնել
Պետական եկամուտների կոմիտեեն e-draft էլեկտրոնային հարթակում շրջանառել է որոշման մի նախագիծ, ըստ որի՝ ԵՏԱՄ տարածքից դուրս հաշվառված, բայց ԵԱՏՄ տարածքում շահագործվող բոլոր տեսակի տրանսպորտային միջոցները պետք է մաքսատուրքի հարյուր տոկոսի չափով դեպոզիտ վճարեն: Խոսքը, մասնավորապես, Հայաստանում շահագործովող ավելի քան 10 հազար ավտոմեքենաների մասին է, որ, հիմնականում, գրանցված են Վրաստանում: Վրացական պետհամարնիշերով ավտոմեքենաները մեր երկրում այս պահին շահագործվում են հետեւյալ կերպ. մեքենան շահագործող անձը մաքատուրքի 4 տոկոսի չափով ապահովագրավճար է մուծում ու մեքենան ՀՀ եւ ԵԱՏՄ տարածքում շահագործելու իրավունք ստանում: Պետական այրերի փոխանցմամբ՝ այդ գումրաը ոչ թե ՀՀ բյուջե, այլ Մաքսային ընդհանուր գոտի է մտնում: Կառավարությունից ավելացնում են նաեւ, որ ՀՀ քաղաքացին, ենթադրենք Գերմանիայից ձեռք բերված մեքենան, Վրաստանում է մաքսազերծում, հետեւաբար՝ դրա գումարը նույնպես մեր երկրի բյուջե չի մտնում: Բացի այդ, շարունակում են որոշման նախագծի ջատագովները, երեւույթը սոցիալական անարդարության զգացում է ստեղծում մեր մյուս հայրենակիցների մոտ, որ մեքենան թե՛ Հայաստանում են մաքսազերծում, թե՛ տարեկան գույքահարկ վճարում համայնքային բյուջե:
Վրացական համարներով մեքենա վարողների մեծ մասը դեմ չէ որոշմանը, բայց չի հաշտվում այն մտքին, որ պետությունը քնել-արթնացել է ու որոշել՝ իրենց հաշվին միանգամից հարստացնել պետական բյուջեն: «Իմ մեքենան ես ձեռք եմ բերել 24 հազար դոլարով, մաքսազերծման 100 տոկոսի չափով դեպոզիտ վճարելը կամ միանգամից մաքսազերծում անելը կարժենա մոտ 15 հազար դոլար: Ստացվում է՝ մոտ 40 հազար դոլարանոց մեքենա կարող էի գնել այդ գումարով: Մենք չենք ասում, թե հրաժարվում ենք հարկուտուրք վճարել, բայց որոշումը պետք է հետին ուժ չունենա, որովհետեւ մեքենան մենք գաղտագողի չենք Հայաստան բերել: Դե եթե էդքան մտածող էին սոցիալական անհավասարության մասին, ինչո՞ւ մեքենան ՀՀ սահմանն անցկացնելիս ու 4 տոկոսի ապահովագրության վճարը վճարելիս չէին ահազանգում էդ մասին»,- ասում է մեր զրուցակիցը:
Պետությունը, փաստոերն, մոտ 10 հազար ՀՀ քաղաքացուց միանգամից միջինը մոտ 10 հազար դոլար է ցանկանում գանձել, ինչը եթե հաշվարկենք, բավական ախորժաբեր գումար կկազմի: Անհասկանալի ու անմիտ է նաեւ ՊԵԿ-ի առաջարկած այն դրույթը, որ մաքսատուրքի 100 տոկսոսի չափով վճարված դեպոզիտը քաղաքացուն կվերդարձվի ճիշտ այն ժամանակ,երբ նա մեքենան ՀՀ տարածքից դուրս հանի:
Իրավաբան Արտակ Խաչատուրովը «Ազգ»-ի հետ զրույցում հարց է տալիս՝ ինչպե՞ս է օրինակ կարգավորվելու Ջավաքից Հայաստան եկող-գնացող կամ Ուկրաինայից Հայաստանում ապաստանած մեր հայրենակիցների հարցը:
«Նախագծով ստացվում է, որ այս մարդիկ, իրենց անձնական մեքենաներով ՀՀ այցելելիս, ստիպված են լինելու նույն գրավը մուծել որպես երկքաղաքացիներ: Նախագիծը կազմողները գնահատել են, որ տարածաշրջանի եւ ՀՀ կապի տեսանկյունից այն ի՞նչ հետեւանքներ կարող է ունենալ: Իսկ եթե մարդիկ Ջավախք-ՀՀ ինտենսիվ անձուդարձի մեջ են, գրավի ընդունման եւ հետվերադարձի նույնքան արագ մեխանիզմեր կարո՞ղ եք ապահովել»,- բարձրաձայնում է մեր զրուցակիցը:
Նշենք,որ նախագիծը դեռեւս քննարկման փուլում է: Այն հաստատողն ու մերժողը կառավարությունն է եւ ոչ թե խորհրդարանը, քանի որ սա ոչ թե օրենքի, այլ որոշման նախագիծ է:
ՍԵՎԱԿ ՎԱՐԴՈՒՄՅԱՆ
