2025 թվականի հունիսի 18-ից 22-ը տեղի ունեցավ Պեկինի 31-րդ միջազգային գրքի ցուցահանդեսը (Պեկինի միջազգային գրքի ցուցահանդես 2025), որը Ասիայի ամենամեծ գրքային ֆորումն է եւ աշխարհում երկրորդ ամենամեծ գրքային միջոցառումը: Ցուցահանդեսը, որը կազմակերպվում է 1986 թվականից ի վեր Չինաստանի ազգային հրատարակությունների ներմուծման եւ արտահանման խմբի կողմից, անցկացվեց Պեկինի ազգային կոնվենցիաների կենտրոնում, ինչպես նաեւ առցանց:
2025 թվականի ցուցահանդեսին մասնակցել են 80 երկրների ավելի քան 1700 կազմակերպություններ՝ ներկայացնելով ավելի քան 220 հազար հրատարակություն՝ գիտության, կրթության, տեխնոլոգիաների եւ մշակույթի հիմնական ոլորտներում:
BIBF-2025-ում հատուկ ուշադրություն դարձվեց գիտական, տեխնիկական եւ բժշկական գրականությանը (STM – Գիտություն, տեխնոլոգիա եւ բժշկություն): Առաջին անգամ անցկացվեց STM մասնագիտացված համաժողով՝ համաշխարհային առաջատար հրատարակիչների (Elsevier, Springer Nature, Wiley, Cambridge University Press եւ այլն) մասնակցությամբ, եւ բացվեց Ակադեմիական թվային հրատարակչության կենտրոնը՝ թվային ակադեմիական ռեսուրսներին նվիրված տաղավար:
Հաշվի առնելով անվանի գիտնական, Հայկական էներգետիկական ակադեմիայի հիմնադիր նախագահ, Ռուսաստանի բնագիտության ակադեմիայի պրոֆեսոր, «Ազգ»-ի երկարամյա աշխատակից Ստեփան Պապիկյանի կատարած գիտական աշխատանքների արդիականությունը, գիտական եւ մանկավարժական մեծ փորձը, նրա աշխատությունների ամփոփագրերը ներառվել են XXղI Պեկինի միջազգային գրքի տոնավաճառ-2025-ի կատալոգում (հունիսի 18-22, Պեկին, Չինաստան):
Հարկ է նշել,որ Ս.Պապիկյանը հեղինակ է շուրջ 300 գիտական աշխատությունների եւ բազմաթիվ մենագրությունների: Նրա գիտական աշխատանքները դեռեւս Խորհրդային Միության տարիներին ներդրվել են Մոսկվայի էներգահամակարգում եւ բազմաթիվ կազմակերպություններում: Նա համաշխարհային ճանաչման արժանացած վաստակաշատ գիտնական է:
Նրա կողմից մշակվել են ջերմամատակարարման համակարգերի ռեժիմների ուսումնասիրության մի շարք արժեքավոր մեթոդներ, որոնք հնավորություն են տալիս լուծելու բազմաթիվ խնդիրներ՝ հաշվի առնելով ելակետային տվյալների անորոշությունը եւ ռեժիմային հարցեր: Մասնավորապես, հիմնավորել է ռեժիմների վերլուծության միջակայքային մեթոդը, որը զգալիորեն հեշտացնում է իրականացնել ինժեներական հաշվարկները, հատկապես շուկայական հարաբերությունների պայմաններում:
Նրա գրչին են պատկանում` Հայաստանի ջրաղացները; Երեւան քաղաքի էներգետիկայի պատմությունը; Հայաստանի եւ Արցախի գազամատակարարման պատմությունը, Երեւան քաղաքի փողոցների լուսավորության պատմությունը; Արցախի էներգետիկան; Գյումրի քաղաքի էներգետիկայի պատմությունը; Հայաստանի էներգետիկայի պատմությունը քառհատոր արժեքավոր գիտական մենագրությունները: Ս. Պապիկյանի էներգետիկայի բնագավառին նվիրված ուսումնասիրություններն աչքի են ընկնում պրոֆեսիոնալ բարձր մակարդակով, ուսումնասիրվող նյութի քաջ իմացությամբ: Դրանք առանձնանում են քննարկվող առարկայի հանդեպ թարմ եւ ինքնատիպ մոտեցումներով:
