Մարտի 15-ին Մոսկվայում կայացավ ԻԻՀ ԱԳ նախարար Ամիր-Աբդոլլահիանի հանդիպումը ՌԴ ԱԳ նախարար Սերգեյ Լավրովի հետ։ Այցը լուսաբանող տեղեկատվական նյութերից, ինչպես նաեւ նախօրեին Իրանի ԱԳ նախարարության խոսնակի տարածած հայտարարություններից տեղեկանում ենք, որ հանդիպման օրակարգում ներառված էր ուկրաինական ճգնաժամին ու Համատեղ գործողությունների համապարփակ ծրագրի՝ ՀԳՀԾ-ի ընդհատված բանակցություններին վերաբերող երկու հարց։
Ինչպես մամուլն է տեղեկացրել, նախորդ շաբաթ նախարար Լավրովը ԱՄՆ-ից գրավոր երաշխիքներ էր պահանջել, որ ուկրաինական ճգնաժամի կապակցությամբ ՌԴ-ի նկատմամբ սահմանված պատժամիջոցները բացասաբար չեն անդրադառնա ՀԳՀԾ-ով նախատեսված առեւտրատնտեսական ու ներդրումային ռեժիմի վրա, եւ հույս էր հայտնել, որ ընթացիկ ճգնաժամի պատճառով ՀԳՀԾ-ի բանակցային գործընթացին հասցված խնդիրները չեն վնասի Ռուսաստանի ազգային շահերին։
Այդ կապակցությամբ Իրանում հնչեցին խիստ քննադատական խոսքեր առ այն, որ Ռուսաստանը ՀԳՀԾ-ի վերագործարկման հարցում նոր խոչընդոտներ է հարուցում, այդ գործելակերպը համարելով Իրանի ներքին գործերին Ռուսաստանի միջամտության նոր դրսեւորում։ Սակայն ԻԻՀ ԱԳՆ խոսնակ Խաթիբզադեն մարտի 14-ի մամուլի ասուլիսի ժամանակ Ռուսաստանի գործելակերպը, խոսնակի վերապահումով արտահայտված ձևակերպմամբ՝ «մինչ այս պահը» համարել է «կառուցողական», իսկ Վիեննայի բանակցությունների դադարը՝ «կարճատեւ ընդմիջում»։
Չնայած «Ամերիկայի Ձայն»-ի պարսկերեն բաժնի տեղեկությունների համաձայն, Վաշինգտոնը մերժել է Մոսկվայի պահանջն ու պարզաբանել, թե Մոսկվան չի կարող Ուկրաինայի նկատմամբ գործադրած ագրեսիայով պայմանավորված պատժամիջոցները կապակցել Վիեննայում ընթացող բանակցությունների հետ, սակայն «Ինտերֆաքս»-ը, վկայակոչելով երկու արտգործնախարարների համատեղ մամուլի ասուլիսի ժամանակ Լավրովի արտասանած խոսքերը, նշում է, որ Ռուսաստանը ԱՄՆ-ից ստացել է անհրաժեշտ երաշխիքները, եւ համոզված է, որ պատժամիջոցները բացասաբար չեն անդրադառնալու ՀԳՀԾ-ով պայմանավորված ռուս-իրանական համագործակցության վրա։
Հավելենք, որ նույն «Ամերիկայի Ձայն»-ի պարսկերեն բաժնի փոխանցմամբ, Ֆրանսիան, Իտալիան ու Գերմանիան, համատեղ հայտարարությամբ նույնպես զգուշացրել են Ռուսաստանին, որ Իրաի հետ Համատեղ գործողությունների համապարփակ ծրագրով (ՀԳՀԾ) նախատեսված առեւտրատնտեսական ու ներդրումային համագործակցության մասին Ռուսաստանի պահանջը կարող է ձախողել Վիեննայի բանակցությունները։
Ավելին, ամերիկյան «Ուոլ Սթրիթ Ջուռնալ» օրաթերթի փոխանցմամբ, ԱՄՆ կառավարության բարձրաստիճան մի պաշտոնյա նշել է, որ Վաշինգտոնը Մոսկվային զգուշացրել է մեկ շաբաթյա ժամկետում հրաժարվել ներկայացրած պահանջից, հակառակ դեպքում, ԱՄՆ-ը կաշխատի հարցի այլընտարնքային լուծում գտնել, որոնց թվում կարող է դիտարկվել նաեւ Իրանի հետ ժամանակավոր համաձայնության գալու տարբերակը։
ԳՐԻԳՈՐ ԱՌԱՔԵԼՅԱՆ
Իրանագետ
