Խայտաբղետ պատկեր է ձեւավորվել Երեւանի ավագանու ընտրություններին: Քարոզարշավին մասնակցող բոլոր ուժերին մեկ անունով կարելի է «Ելք» դաշինք կոչել: 13 կուսակցություններն ու մեկ դաշինքը հետեւում են քաղաքապետ դառնալու անսանձ ցանկություն ունեցող Տիգրան Ավինյանի` քաղաքացիներին մեկիկ-մեկիկ բարեւելու շոուին, կամ էլ պարզապես պտտվում են նրա արբանյակի շուրջը՝ ընտրություններից հետո քաղաքային արեւի տակ իրենց տեղը գտնելու համար: Փոքրիշատե առանձնանում է իշխանության գալու, կարծես թե, լուրջ հայտ ներկայացրած ու Արցախից սկսող Ռուբեն Վարդանյանի «Ապրելու երկիրը»` ի դեմս նախկին լուսավորական ու պատերազմից հետո նորից Արցախում կարճ ընթացք աշխատած Մանե Թանդիլյանի: Քարոզարշավի մեկնարկից թեեւ մի քանի օր է անցել, բայց ակնհայտ է` Վարդանյանը գումար չի խնայում` ցանկալի արդյունք գրանցելու համար: Առավել տարօրինակ ու զարմանալի է Անդրանիկ Թեւանյան-Զարուհի Փոստանջյան դուետը, որ ընտրություններին ձեւավորած միակ դաշինքն է: Եթե մինչեւ ընտրությունները հիմնազուրկ էին թվում խոսակցությունները, թե դաշինքը երկրորդ նախագահ Ռոբերտ Քոչարյանի կուրացիայի տակ է, ապա այժմ դա առավել քան հստակ է. դաշինքի՝ քարոզարշավի մասին նյութերը Ռոբերտ Քոչարյանի որդին` Լեւոն Քոչարյանը, Facebook- ի իր էջում հաճախ է տեղադրում: Փաստորեն` իր գործունեության ամբողջ ընթացքում Քոչարյանին քննադատած Փոստանջյանն այժմ ՀՀ երկրորդ նախագահի դաշինքի մաս է կազմում:
Նախկին քաղաքապետ Հայկ Մարությանն էլ, որ անգամ լրագրողների հետ շփումներից վախեր ունի, խոստանում է «Շարունակել», ըստ երույթին` ընդհատակում մնալու ու ընտրյալների հետ հաղորդակցվելու ձեռագիրը:
Թե ով ինչպես կհատի ընտրական ռուբիկոնը, պարզ կլինի սեպտեմբերի 17 -ի կեսգիշերին: Բայց ռուսական ասացվածքով ասած՝ «ոզնուն էլ հասկանալի է», որ պետության համար ծանրագույն այս ժամանակահատվածում երեւանցու դարդն ու ցավն ընտրությունները չեն:
ՍԵՎԱԿ ՎԱՐԴՈՒՄՅԱՆ
