Հիպնոս, բժիշկ, հոգեթերապեւտ, էքստրասենս, հիպնոսողների միջազգային մրցույթի «Ոսկե ձեռքեր» մրցանակակիր: 1990 թ.-ին Հոլանդիայում նրա ելույթները Էքստրասենսների ֆեդերացիայի կողմից բարձր գնահատականի արժանացան, որի արդյունքում նրան շնորհվեց Սպիտակ Մոգի մագիստրոսական կոչում:
Հովիկ Սաքանյանը աշխարհում երկրորդ աճպարարն է, ով ցուցադրել է «Անցում պատի միջով» հնարքը:
Հոլանդիայում, Մոսկվայում, Սարատովում, Կրասնոդարում, Սոչիում, Ադլերում եւ այլ քաղաքների բազմամարդ ակումբներում նրա ելույթները հանդիսատեսի համար ստեղծել են զարմանահրաշ, հետաքրքիր, կախարդական միջավայր: Ներկայացված ծրագրերը աչքի են ընկել մեկը մյուսից գեղեցիկ աճպարարություններով անորսալի մանիպուլյացիաներով եւ հնարքներով:
Հովիկ Սաքանյանը առանձնահատուկ անհատականություն է, ով իր ունակություններն ու հմտությունները չի ծառայեցնում միայն զվարճանքի եւ հաճելի ժամանցի նպատակին: Նա հաստաբուն ծառի նման տվել է հզոր ճյուղեր:
Որդին` Կարենը, ժառանգելով հոր հմտությունները, աշխարհի շատ բեմերում մասնակցել է աճպարարության եւ երգի միջազգային բազմաթիվ մրցույթների, արժանացել տարբեր փառատոնների դափնիների կոչման: Նա այսօր Անապայում նոր հիմնադրած Տիգրան Ավդալյանի անվան «Մուշ» արվեստի կենտրոնի ղեկավարն է:
Կարենի քույրը` Անիտա Թեյլորը, եւս աճպարարական հմտություններ ունի, ով, ինչպես եւ Կարենը, աճպարարության իր ուղղություններն ունի: Նա Ֆրանսիայում միջազգային մրցույթների, միկրոմագիայի դափնեկիր է:
Արվեստի դպրոցում ակտիվ գործունեություն է ծավալում Հովիկի կինը՝ Կարինե Փիլոյանը, որը միաժամանակ Անապայում «Իմ մայր» հայկական ընկերության նախագահն է:
«Արվեստի կենտրոնը ծառայում է տաղանդներ հայտնաբերելուն, ազգային մշակութային արժեքների շուրջ մարդկանց համախմբելուն»,- ասում է Մոգը: «Փողոցը կարող է ազատել հոգիդ, բայց մտքերդ հետապնդում են քեզ, հոգիդ մնում է չմաքրված»: Արվեստի կենտրոնը, որտեղ ուսուցանվում են լեզուներ, երգ, պար օգնում է միավորել մարդկանց, բեռնաթափել հոգիդ խոտոր մտքերից: Տիգրան Մեծը ստեղծեց գերպետություն, սակայն ազգը առավել նշանավորվեց Վռամշապուհով, Մեսրոպ Մաշտոցով, հայ գրի ստեղծումով, որը նպաստեց հայի ինքնության պահպանությանը:
Հովիկ Սաքանյանի գործունեությունը նման է հրաշքի, սակայն ինքն այն կարծիքին է, որ եթե կա հրաշք, ապա դա ընդամենը բնության գիտելիքների պակաս իմացության արդյունք է:
Հովիկ Սաքանյանին՝ նույն Օվիկ Թեյլորին, հանդիսատեսը ընդունում է որպես քայլող զմայլանք ու բարություն: Մարդ, ով առողջական, կրոնական, ազգային, հոգեւոր արժեքների պահպանության զինվոր է եւ անում է հնարավորը, որ մեր օրերում գոյաբանական սպառնալիքները ժամանակին եւ անհրաժեշտ լուծում ստանան:
ՀՈՎՀԱՆՆԵՍ ԿԱՐԱՊԵՏՅԱՆ
Վանաձոր
Նկարում՝ Ձախից` Կարեն Թեյլոր, Կարինե Փիլոյան, Հովիկ Թեյլոր, Անի Թեյլոր հերթական ելույթից հետո:
