ՀՊՄՀ. Մեկդարյա հոբելյանին ընդառաջ

Այս տարի լրանում է Երեւանի Խաչատուր Աբովյանի անվան հայկական պետական մանկավարժական համալսարանի հիմնադրման 100-ամյակը: Հոբելյանի առթիվ համալսարանում տեղի ունեցող միջոցառումների շրջանակում բուհի գիտական գրադարանը իրականացնում է մի օգտակար նախաձեռնություն՝ յուրաքանչյուր 10-օրյակը մեկ կազմակերպում է համալսարանի ամբիոններից մեկի հրատարակած գրքերի ցուցադրություններ: Առաջին ցուցադությունը նվիրված էր մանկավարժությանը: Ապրիլի 4-ին  գրադարանը կազմակերպել էր հերթական միջոցառումը՝ գրադարանի պահոցներում գտնվող համալսարանի շրջանավարտ եւ աշխատակից հոգեբան-գիտնականների ստեղծած հոգեբանական գրականության հարուստ ցուցադրությունը. ներկայացված էին 102 հեղինակների եւ հեղինակակիցների 136 դասագիրք, ուսումնական ու ուսումնաօժամդակ ձեռնարկ, մենագրություն, 6 գիտաժողովների ժողովածուներ, 8 հանդեսների համարներ (150 միավոր գրականություն):

Ցուցադրությունն ընդգրկում էր 1930-2022 թթ. հրատարակված նյութեր. ցուցադրված ամենահին գրքերը Գուրգեն Էդիլյանի՝ 1930 թ. տպագրված  «Հոգեբանություն» եւ «Ձեռնարկ հոգեբանության» դասագրքերն էին, ամենանորը՝ 2022 թ. տպագրված հեղինակային կոլեկտիվի (Ռուզաննա Պետրոսյան, Լեւոն Սարգսյան, Ստեփան Նավասարդյան) «Դատահոգեբանական փորձաքննություն» ձեռնարկը: Ներկայացված էին դոկտոր-պրոֆեսորներ Գուրգեն Էդիլյանի, Մկրտիչ Մազմանյանի, Հովսեփ Թութունջյանի, Սերգեյ Արզումանյանի, Կառլեն Ոսկանյանի, Սրբուհի Գեւորգյանի, Վլադիմիր Կարապետյանի, Սամվել Խուդոյանի, Մելս Մկրտումյանի, Վազգեն Մարգարյանի, Սուսաննա Փիլոսյանի, Կամո Վարդանյանի, պրոֆեսոր Ալբերտ Նալչաջյանի, դոցենտներ Ռուզաննա Պետրոսյանի, Լեւոն Սարգսյանի եւ Մանկավարժական համալսարանի հոգեբանության ամբիոնում ժամանակին դասավանդած եւ այսօր դասավանդող  այլ հոգեբանների գրքեր: Ցուցադրության էին դրված համալսարանում 2010-2019 թթ. կազմակերպված՝ հոգեբանական հիմնախնդիրներին նվիրված գիտաժողովների եւ «Մանկավարժության եւ հոգեբանության հիմնախնդիրներ» հանդեսի հայերեն եւ անգլերեն համարները:

Միջոցառումը բացեց գրադարանի տնօրեն, մշակութաբան, մատենագետ, լրագրող, խմբագիր, պատմաբան, Արցախյան առաջին եւ 44-օրյա պատերազմների մասնակից, ՀՀ բանակի փոխգնդապետ Տիգրան Պետրոսյանցը: Նա ներկայացրեց ցուցադրությունը: Տնօրենն ընդգծեց, որ 1930 թ. տպագրված՝ Գուրգեն Էդիլյանի կազմած 2 դասագրքերը (պատրաստել է նաեւ  դատական հոգեբանությանը նվիրված ձեռնարկ՝ առաջինը Հայաստանում, էլի 1930-ականներին) փաստում են, որ հոգեբանությունը մանկավարժականում սկսել է դասավանդվել եւ ուսումնասիրվել  ոչ թե 1948 թ.-ից, ինչպես ընդունված է կարծել, այլ ավելի վաղ:  Իր խոսքում Տիգրան Պետրոսյանցը նաեւ նշեց, որ 1950-60-ական թթ. մանկավարժականի հոգեբանության ֆակուլտետը բարձր որակավորում ուներ՝ ԵՊՀ նույն ֆակուլտետի շրջանավարտները ասպիրանտուրան ավարտում էին մանկավարժականում. դոկտոր Հովսեփ Թութունջյանը, պրոֆեսոր Ալբերտ Նալչաջյանը ավարտել են ՀՊՄՀ ասպիրանտուրան:

Այնուհետ Տիգրան Պետրոսյանցը խոսքը փոխանցեց համալսարանի ռեկտոր, հոգեբանական գիտությունների դոկտոր, պրոֆեսոր Սրբուհի Գեւորգյանին: Ռեկտորը շնորհավորեց ներկաներին, խոսեց Մանկավարժական համալսարանի հոգեբանության նախկին, հիմա արդեն երջանկահիշատակ դասախոսների մասին, հույս հայտնեց, որ  տարեվերջին գրադարանը կհամալրվի հոգեբանությանը վերաբերող աշխատություններով: Շնորհակալություն հայտնեց ներկա դասախոսներին եւ այն նվիրյալներին, որոնք մեծ ներդրում են ունեցել Հայաստանում հոգեբանական գիտության զարգացման գործում:

Գրադարանի տնօրենը ռեկտորի խոսքը բնութագրեց որպես արտակարգ դասախոսություն ուսանողների համար՝ հոգեբանության զարգացումը մանկավարժական համալասարնում թեմայով:

Ապա բանախոսություններով հանդես եկան հոգեբանական գիտությունների դոկտոր-պրոֆեսոր Կամո Վարդանյանը, հոգեբանական գիտությունների թեկնածու, դոցենտ Ռուզաննա Պետրոսյանը, հոգեբանական գիտությունների դոկտոր- պրոֆեսոր Վլադիմիր Կարապետյանը, հոգեբանական գիտությունների թեկնածու, դոցենտ Մարիաննա Ավետիսյանը, մանկավարժական գիտությունների թեկնածու, դոցենտ, ռազմական հոգեբանության մասնագետ, հոգեբանության ֆակուլտետի առաջին շրջնավարտ Հակոբ Թադեւոսյանը, բանասիրական գիտությունների դոկտոր-պրոֆեսոր Լալիկ Խաչատրյանը, հոգեբանական գիտությունների թեկնածու, դոցենտ Լեւոն Սարգսյանը, կրթության հոգեբանության եւ սոցիոլոգիայի ֆակուլտետի շրջանավարտ Տիգրանուհի Արշակյանը, նույն ֆակուլտետի 2-րդ կուրսի ուսանողուհի Սուսաննա Ստեփանյանը:

Վերջում Տիգրան Պետրոսյանցը շնորհակալություն հայտնեց ռեկտորին, ըստ պարոն Պետրոսյանցի՝ ուսանողները բաց դասի մասնակից դարձան, որն իրենց ուղղորդելու է իրենց հետագա ուսումնական պոցեսում:

ՀՐԱՉՅԱ ԲԱԼՈՅԱՆ (Արմենյան)

Բան. գիտ. թեկնածու

Մանկավարժական համալսարանի 2002 թ. շրջանավարտ