Հուլիսի 5-ից նոյեմբերի 4-ը Ավստրալիայի գլխավոր օպերային ընկերությունը՝ Սիդնեյի «Օպերա Ավստրալիան», ներկայացնում է Վերդիի «Տրավիատան», որտեղ տղամարդու գլխավոր դերերգը կատարում է միջազգային բեմերում հանդես եկող հայ տենոր Լիպարիտ Ավետիսյանը:
Ավստրալական գլխավոր պարբերականում՝ «Սիդնեյ մորնինգ հերալդում», Փիթեր Մքքալամը գրել է. «Երիտասարդ հայ տենոր Լիպարիտ Ավետիսյանը Ալֆրեդո Ժերմոնի դերն իրավացիորեն սկսեց երկչոտ զսպվածությամբ՝ տողերին քնարականորեն հետեւելով լավ կառավարվող թեթեւ ձայնով: Երկրորդ գործողությունը նա սկսեց գունեղ ծաղկումի եւ նրբին փայլի ձայնով, է՛լ ավելի հիմնավոր խորաթափանցությամբ եւ կրքով»: Իսկ Ավստրալիայի եւ Նոր Զելանդիայի հրեական «J-Wire» առցանց պարբերականում Վիկտոր Գրինբերգը գրել է. «Որպես իր առաջին ճշմարիտ սեր՝ հայ տենոր Լիպարիտ Ավետիսյանը կատարելապես համապատասխանում է Ալֆրեդոյին: Նրա հարուստ տենոր ձայնը եւ դերասանական խաղը ցույց տվեցին, որ հարաբերությունների դրաման նա խաղաց հիանալի կերպով, հատկապես հայր Ջորջոյի միջամտությունից հետո»:
31-ամյա Լիպարիտ Ավետիսյանն ավարտել է Թեոդոսիայի երաժշտական դպրոցի վոկալ բաժինը, այնուհետեւ ուսումը շարունակել է Մոսկվայի Չայկովսկու անվան պետական կոնսերվատորիայում: Երկու տարի անց ուսումը շարունակել է Երեւանի Կոմիտասի անվան կոնսերվատորիայում: Նրա առաջին բեմելը Եվրոպայում տեղի է ունեցել Քյոլնի (Գերմանիա) օպերային թատրոնում: 2013 թվականից Լիպարիտ Ավետիսյանը Երեւանի Սպենդիարյանի անվան Օպերայի եւ բալետի ազգային ակադեմիական թատրոնի մեներգիչ է: Գլխավոր դերերգերով հանդես է եկել Ֆրանկֆուրտի օպերային թատրոնում, Լոնդոնի Քովենթ Գարդեն Թագավորական օպերային եւ Սիդնեյի Օպերային թատրոններում: Միջազգային մի շարք մրցույթների դափնեկիր է, այդ թվում՝ 2016 թվականին Սանկտ-Պետերբուրգի «Օնեգին» առաջին ռուսական ազգային մրցանակաբաշխության «Լավագույն հրավիրյալ երգիչ» անվանակարգի մրցանակակիր:
Ա. Բ.
