Էն, որ ասում էին մոլդովական սցենար, ու սրանք օգնություն էին խնդրում եվրոչինովնիկներից, արդեն իսկ ամբողջությամբ գործի է դրվել Հայաստանում: Մենք հիմա դրա մեջ ենք:
Բառացիորեն նույն սցենարը` նույն երկրներում գործող մեդիա-վերլուծական հարթակների, կասկածելի կենտրոնների կասկածելի ֆինանսավորմամբ ֆոնդերի միջոցով (նույն «Досье» կենտրոնը և այլ հարթակներ տառացիորեն նմանօրինակ «աղմկահարույց հետաքննություններ» հրապարակեցին ժամանակին նաև Վրաստանում, Մոլդովայում, կասկածելի, կեղծիք պարունակող այդ նյութերը տարածեցին տեղի իշխանական մեդիաների, իրենց խոսափող ՀԿ-ների, բլոգերների միջոցով` ընդդեմ ընդդիմադիր թեկնածուների և ուժերի), որոնց հիմնադիրը Խոդորկովսկին է (և ոչ միայն), նույն կեղծ արտահոսքերը` իբր ներքին փաստաթղթերի ու հեռախոսային զանգերի վերծանումների վրա հիմնված` նույն աղբյուրներին հղումներով…
Մոլդովայում էլ ընդդիմադիր գործիչներին, բոլոր ընդդիմախոսներին իշխանությունները և նրանց աջակցող ներքին և արտաքին շրջանակները պիտակավորեցին որպես Կրեմլի, Պուտինի ագենտներ, «օտարերկրյա գործակալներ», լրտեսներ, պետական դավաճաններ…
Տառացիորեն նույն սցենարն է, նույն գործիքակազմը` նույն դերակատարներով, նույն կենտրոններից ֆինանսավորվող…
Շուտով, ըստ այդ մոլդովական (և ոչ միայն) սցենարի, այդ կասկածելի աղբյուրների արտահոսքերին հղում տալով` կսկսեն հարուցվել գործեր «պետական դավաճանության» և «կուսակցության անօրինական ֆինանսավորման» հոդվածներով, ձերբակալություններ, տնային կալանքներ, որպեսզի կաթվածահար անեն ընդդիմության կարևոր գործիչների քաղաքական ակտիվությունը ընտրական կարևոր`հատկապես վերջնական փուլում, ապալեգիտիմացնեն նրանց։
Սպասեք, շուտով կփորձեն ընդդիմադիր լրատվական կայքեր, հեռուստաալիքներ արգելափակել, պետք լինի` արտակարգ դրություն էլ կսահմանեն, որոշ ընդդիմադիր կուսակցությունների ընտրություններից երկու օր առաջ պաշտոնապես կհայտարարեն հակասահմանադրական և կարգելեն (անօրինական ֆինանսավորման հիմքով)…
Սրանց սցենարը, գործիքները ու նպատակը նույնն է, ինչ Մոլդովայում:
Իսկ ե՞րբ հատկապես այդ գործիքները սրեցին, ո՞ր փուլում: Երբ հասկացան, որ Մայա Սանդուն (տվյալ դեպքում` Փաշինյանը) չի կարողանում հաղթանակ ապահովել:
Խոդորկովսկու վերոնշյալ հարթակների և այլ աղբյուրների նետած արտահոսքերը Մոլդովայում դարձան այն անհրաժեշտ կատալիզատորը, որը իշխանությունների ձեռքերն ազատ արձակեց ընդդիմության դեմ որպես պատրվակ կոշտ մեթոդներ օգտագործելու համար:
Ինչի ասես չդիմեցին, որպեսզի Մայա Սանդուին մի կերպ անցկացնեն` 55% ձայն ստանա:
Բայց, մի կարևոր, շատ կարևոր նյուանս: Մոլդովայում Սանդուին այդ ամենից հետո նույնիսկ մի կերպ կարողացան անցկացնել արտերկրում (Եվրոպայում և ԱՄՆ-ում) բնակվող մոլդովական սփյուռքի քվեարկությունների միջոցով, դարձյալ կեղծիքներով, չմանրամասնեմ, գիտեք։
Հայաստանում դա հնարավոր չէ: Որպեսզի այդ սցենարը կանխվի, պետք է ԲՈԼՈՐՍ ՄԱՍՆԱԿՑԵՆՔ, ԳՆԱՆՔ ԸՆՏՐՈՒԹՅՈՒՆՆԵՐԻ, ՏԵՐ ԿԱՆԳՆԵՆՔ ՄԵՐ ՁԱՅՆԵՐԻՆ, ՏԵՐ ԿԱՆԳՆԵՆՔ ՄԵՐ ԵՐԿՐԻՆ…
ՔՊ-ն ու իր պարագլուխը, հովանավորները հասկանում են, որ ընտրություններում մեծ մասնակցություն է լինելու: Մոլդովայի սցենարը կկիրառեն, բայց դրանից Նիկոլի վարկանիշը չի բարձրանալու, ցանկալի տոկոսը չեն կարողանալու ապահովել, իսկ կտրուկ քայլերը վտանգավոր զարգացումների կհանգեցնի, սփյուռքն էլ, Մոլդովայի օրինակով, չի կարող մասնակցել մեր ընտրություններում… Դրա համար էլ գյուղապետերով, քաղաքապետերով, տասովշիկներով տնետուն են մտնում ու մարդկանց համոզում, սպառնում, շանտաժ անում` եթե Նիկոլին չեն ընտրելու, գոնե չգնան ընտրությունների…
- Մեր պատասխանը պետք է լինի` ընտրություններին բոլորիս մասնակցությունը:
ՔՊ-ն` իր շեֆ-շեֆերով հանդերձ վախենում է մեկ բանից` ՀՀ քաղաքացուց: Ակտիվ, հայրենիքին տեր կանգնող քաղաքացուց:
Այսքան բան:
Սաթիկ Սեյրանյան, Հայաստանի ժուռնալիստների միության նախագահ
