Չինական news.cn պորտալն անդրադարձել է 30-ամյա Ալետա Հակոբյանին, որը ստվերային ներկայացումների միջոցով պատմում է չինական մշակույթի մասին: Ստվերային թատրոնի հայազգի երկրպագուն որպես բեմ օգտագործում է իր ձեռքով պատրաստված մեծ տուփը, լուսավորման համար՝ լամպ, իսկ որպես էկրան՝ սպիտակ թուղթ: Նա համացանց է ներբեռնել ստվերային ներկայացումների մի քանի տեսահոլովակ ու դրանով գրավել օգտատերերի ուշադրությունը: Ըստ նրա՝ ստվերային ներկայացումը չինական միֆերի, առասպելների, պատմության եւ մշակույթի մասին պատմելու հրաշալի միջոց է:
Ալետան Չինաստան է գնացել Հայաստանից՝ երեք տարի առաջ, անգլերեն դասավանդելու նպատակով: Եղել է տարբեր վայրերում եւ հատկապես հրապուրվել տեղական բանահյուսությամբ ու առասպելաբանությամբ. «Դրանք հիասքանչ են, հմայիչ եւ իմաստությամբ լի»: Երկար ժամանակ որոնել է պատումի յուրահատուկ եւ նոր միջոց, որպեսզի իր հավաքած ժողովրդական հեքիաթները հաղորդակից դարձնի մարդկանց:
Չինաստանի հյուսիս-արեւմուտում գտնվող Սիան քաղաքի թանգարանում դիտելով ստվերային ներկայացում՝ Ալետան հասկացել է, որ ուզում է հենց այդ արվեստով զբաղվել: Սակայն եթե ստվերային տիկնիկներն ավանդաբար պատրաստվում են կենդանիների կաշվից, Ալետան օգտագործում է թուղթը, որից զգուշորեն սիլուետներ է պատրաստում:
Ալետան բազմաթիվ դիտողներ ունի նաեւ Հայաստանից, իսկ Նյան հրեշի մասին նրա ներկայացումը ցուցադրվել է հայկական հեռուստատեսությամբ: Այժմ նա նոր պատմություն է հորինում՝ հիմնված հին չինական պոեզիայի վրա:
«Երբ իմ չինարենը բավականաչափ բարելավվի, ես տեսահոլովակներ կնկարահանեմ հայկական առասպելների, ավանդազրույցների եւ սովորույթների մասին ու իմ երկրի մշակույթը կներկայացնեմ չինական լսարանին»,- ասել է Ալետան:
Անգլերենից թարգմանեց ԱՇՈՏ ԳՐԻԳՈՐՅԱՆԸ
