Ըստ «Հայաստանի օր Իսրայելում» ֆեյսբուքյան էջի՝ օգոստոսի 29-ին Իսրայելի Պետահ-Տիկվա քաղաքի Հիմնադիրների հրապարակում առաջին անգամ տեղի է ունեցել երեկո՝ ամբողջությամբ նվիրված հայ մշակույթին եւ ժառանգությանը: Միջոցառումը կյանքի է կոչվել քաղաքապետարանի եւ հայ համայնքի միջեւ սերտ եւ արդյունավետ համագործակցության շնորհիվ: Միջոցառմանը, ի թիվս այլոց, մասնակցել են քաղաքապետ Ռամի Գրինբերգը, Իսրայելում ՀՀ դեսպան Արմեն Հակոբյանը եւ Երուսաղեմի Հայոց պատրիարքարանի ներկայացուցիչները: Ներկա են եղել մոտ 1000 հյուրեր (նաեւ հայեր Յաֆայից, Հայֆայից եւ Երուսաղեմից), շատերն առաջին անգամ են ծանոթացել Հայաստանին: Թեեւ միջոցառումը տոնական էր, սակայն երեկոյի կազմակերպիչները չեն անտեսել արցախահայության պաշարումը, տեղադրվել է այդ հարցին նվիրված վահանակ՝ մանրամասն բացատրությամբ եւ նշաններով, իսկ բեմում Հայաստանի դրոշի հետ մեկտեղ կախված է եղել նաեւ Արցախի դրոշը: Երուսաղեմահայ Միհրան Տեր-Մաթոսյանն իր ելույթում անդրադարձել է ադրբեջանական իշխանությունների կողմից էթնիկական նոր զտումների փորձին. հարցը լուսաբանել է նաեւ խոսնակ Մարինա Կոզլիները (ծնունդով երեւանցի): Ելույթներով հանդես են եկել երգիչ եւ դերասան Աշոտ Գասպարյանը, դուդուկահար Իլյա Մազիան, իսրայելական բալետի առաջատար մենակատար Լյուդվիգ Իսպիրյանը, Էմիլ Խաչատրյանի եռյակը, ջազ երաժիշտ Արման Ասլանյանը, դաշնակահար Գեւորգ Բադալյանը, երգչուհիներ Լաուրա Վարդանյանը, Սոսե Ալեքսա Գրիգորյանը, Աբիգայլ Էֆերգանը, որը կատարել է հայերեն երգ: Գեղարվեստական մասից զատ, հրապարակի տարբեր անկյուններում ներկայացվել են հայկական խեցեգործությունը, տարազները, գրականությունը:
Ադրբեջանին զինող Իսրայելում նման միջոցառումների անցկացումը, անշուշտ, շատ հուսադրիչ չէ, սակայն նաև պետք չէ անտեսել…
Ա. Բ.
