Յուրի Հովհաննիսյանի անվան արվեստի եւ գրականության ժողովրդական համալսարանը 50 տարեկան է: Համալսարանականներն այդ առիթն օգտագործել են` մեծարելու եւ գնահատելու համար Մեծն Կոմիտասին եւ նրա 155-ամյակին նվիրված համահայկական առցանց ֆլեշմոբ են կազմակերպել: Ֆլեշմոբը առցանց Կոմիտասին նվիրված ստեղծագործություններ հանրայնացնելու նախաձեռնություն էր, որին, համալսարանի ռեկտոր Անահիտ Օհանյանի վկայությամբ, միայն հայ արվեստագետներ չեն մասնակցել, այլ տարբեր ազգության շատ արվեստագետներ աշխարհի տարբեր երկներից: Հայ եւ այլազգի արվեստագետներն իրենց կտավներով, ասմունքով, կատարումներով տեւական ժամանակ հագեցրել են համացանցը կոմիտասյան թեմայով իրենց ստեղագործություններով` այդ հիանալի նախաձեռնությանն առցանց ներգրավելով հազարավոր կոմիտասասերների, որոնք հաղորդակից են դարձել Կոմիտասի հավաքած գանձերի ու մշակումների առցանց ունկնդրության, դիտել ֆիլմեր, կտավներ, լսել չափածո ստեղծագործություններ:
Այս հիանալի նախաձեռնությունն ամփոփվեց Եղիշե Չարենցի տուն-թանգարանում, որը եւս մասնակից էր առցանց նախաձեռնությանը: Համալսարանը սահմանել էր Կոմիտասի պատկերով հուշամեդալներ, որոնք հանձնվեցին Կոմիտասին առցանց իրենց ակտիվությամբ եւ աշխատանքներով հանրայնացրած նկարիչ Արթուր Օշականցուն, Չարենցի տուն-թանգարանին` ի դեմս տնօրեն Ժաննա Մանուկյանի եւ օպերային երգչուհի Նարինե Անանիկյանին: Թանգարանում տեղի ունեցած գողտրիկ միջոցառումը եւս` Արթուր Օշականցու խոսքով, Նարինե Անանիկյանի հրաշալի կատարմամբ Կոմիտասի մեծարման տուրք էր:
