Կրթության, գիտության, մշակույթի եւ սպորտի նախարարությունն իր ենթակայությամբ գործող կառույցներում սեփական մարդկանց է նշանակում, որ վերահսկի՝ ի՞նչ գործունեություն են իրականացնում այդ մարմինները: «Ազգ»-ի տեղեկություններով՝ հատկապես թատրոնների եւ համերգասրահների տնօրեններին հրահանգված է՝ կենտրոնների գործունեությունն այնպես կազմակերպել, որ այն իշխող կուսակցության՝ «Քաղաքացիական պայմանագրի» քիմքին հաճելի լինի:
«Դա վերաբերում է նաեւ բովանդակությանը. մի քանի թատրոնների խաղացանկերից որոշ ներկայացումներ հանել են: Տնօրենները գեղարվեստական ղեկավարներին ասել են, թե դրանք քաղաքական ենթատեքստ ունեն: Գեղղեկերից մեկն, օրինակ, ընդդիմացել է, ի պատասխան տնօրենը հասկացրել է, որ ավելորդ գլխացավանք չեն ուզում ստեղծել»,- նշեց մեր զրուցակիցը:
Խոսքի ազատության մասին ճամարտակող իշխանությունը, փաստորեն, անցել է խորհրդային ժամանակների կարգուկանոնով գործելուն՝ գրաքննությանը, երբ այս կամ այն հոդվածն ու գիրքը տպելուց առաջ այն նախ պետք է «գլավլիտի» մկրատող գրչի տակով անցներ:
«Ազգ»-ի ձեռքի տակ կան նաեւ այն հաստատությունների եւ տնօրենների անունները, որոնք արգելել են ներկայացում կամ մշակութային այլ միջոցառում բեմադրել, ցուցադրել՝ դա պատճառաբանելով քաղաքական ենթատեքստով: Հարկ եղած դեպքում կհրապարակենք կոնկրետ անուններ:
ՍԵՎԱԿ ՎԱՐԴՈՒՄՅԱՆ
