Հարավային Կալիֆոռնիայի 3 պարբերականներ (Los Angeles Magazine, Pasadena Magazine եւ Orange Coast Magazine) տարեվերջին վաճառվել են «Engine Vision Media» ընկերությանը, որի հիմնադիրներն են ճանաչված իրավաբաններ Մարկ Կիրակոսն ու Բեն Մեյսելասը, տեղեկացնում է «Միրոր Սփեքթեյթր» շաբաթաթերթը, լուրը արտատպելով «The Hollywood Reporter»-ից:
«L.A.M.»ը անմիջապես տեղափոխվելու է «Engine Company»-ի պատմական հասցեն: Աշխատակազմը շարունակելու է անփոփոխ մնալ: Նոր տերերը խոստացել են բարելավել բովանդակությունը եւ նշանակալիորեն խթանել պարբերականների թվայնացման գործընթացը:
«Լոս Անջելեսում ծնված եւ Փասադենայում մեծացած անձիս համար իրականացած երազ է կարողանալ օգնել այդ երեք պարբերականներին, որպեսզի անհրաժեշտ միջոցներ տրամադրելով նրանք ավելի բարձր մակարդակով շարունակեն ծառայել իրենց համայնքներին», նշել է Մարկ Կիրակոսը, իսկ Բեն Մեյսելասն ավելացրել է. «Իմ տեսլականում այս պարբերականները շուտով կդառնան տեղեկատվության արժանահավատ աղբյուրներ եւ իրար կմիավորեն համապատասխան համայնքները»:
«L.A.M.»ը վերջին անգամ վաճառվել էր 2017-ին, երբ «Emmis Communications»ը համաձայնել էր իր ունեցվածքը փոխանցել «Hour Media»ին, որը մի շարք պարբերականներ հրատարակող ընկերություն է Դետրոյթում: Այդ ժամանակ նոր սեփականատերերը խմբագիր Մերի Մելտոնին ազատել էին աշխատանքից եւ 2019-ին այդ պաշտոնը վստահել Մայեր Ռոշանին, որ շարունակելու է մնալ իր պաշտոնում «Engine Vision»ի տնօրենության տակ:
Ավելացնենք, որ «L.A.M.»ի ամսական շրջանառությունը 2020-ին 120 հազար էր: Մարկ Կիրակոսը հանրածանոթ է նաեւ Հոլիվուդում: Վարել է Մայքլ Ջեքսոնի, Քրիս Բրաունի, Վայնոնա Ռայդերի, Նիկոլ Ռիչիի եւ Շոն Կոմբսի դատական գործերը: Քանիցս նա գլխավոր հանդիսավարն է եղել «Հայաստան» համահայկական հիմնադրամի ամենամյա տելեմարաթոնների հեռարձակմանը: Իսկ Բեն Մեյսելասը «Geragos and Geragos» ընկերությունում ղեկավարում է քաղաքացիական եւ գործարքային ընթացակարգերի բաժինը: Հարցազրույցներից մեկի ժամանակ նա նշել է, որ ցանկանում է մեդիա ցանց կառուցել, որը մի օր կմրցի «Fox News»ի հետ եւ կդառնա իսկական ժողովրդավարական խոսափող:
Պատրաստեց` ՀԱԿՈԲ ԾՈՒԼԻԿՅԱՆԸ
