Իմաստաբանական բառարան

Հեծանվի երկունքը

Հեծանիվը ծնունդ է առել հունվարի 5-ին: Բայց դրա երկունքը տարբեր երկրներում  տարաբնույթ  է եղել: Հայաստանում, օրինակ, հեծանիվի երկունքը դեռ շարունակվում է:

Անշուշտ, հեծանվի ծննդյան ամսաթիվը պայմանական է ընտրված, որպեսզի մարդիկ ավելի հարուստ տոնացույց ունենան:

Բայց այդ չարագուշակ օրը՝ հունվարի 5-ը, աղետաբեր է եղել  շատերի համար. Կարմիր բանակը հենց այդ օրն է գրավել  Վիլնյուսը:

Տարեգրության մեջ հունվարի 5-ը նշանավորվելու է նաեւ նրանով, որ ԱՄՆ նախագահ Էյզենհաուերի «օրհնությամբ» է Մերձավոր Արեւելքը վերածվել    սառը պատերազմի թատերաբեմի:  Ամերիկյան ատոմային USS Dwight Eisenhower ավիակիրը 2024 թվականի հունվարի 5-ին  է  մուտք գործել Կարմիր ծով: 

Հեծանվի ծնունդը չարագուշակ է եղել  նաեւ Բրազիլիայի համար:

Եթե հեծանիվը ծնունդ չառներ, ապա 2018 թվականի Բրազիլիայի նախագահական ընտրություններին մասնակցող եւ նախընտրական արշավի ժամանակ հեծանվով հանրությանը ներկայացած նախագահի թեկնածու Ժաիր Մեսիաս Բոլսոնարուն չէր դանակահարվի:

Ընդհանրապես, ԱՄՆ նախագահներից շատերը՝ Ջիմի Քարթերը, Նիքսոնը, Ռեյգանը, Օբաման, իրենց կանանց հետ զբաղվել են հեծանվավազքով, եւ հավանաբար հեծանիվ վարելու  ժամանակ հիշել են հեծանվավազքից անասելի հաճույք ստացած ու այդ սպորտաձեւի մեծ սիրահար  նախագահ Քենեդիին:

Էլ չենք խոսում նախագահ Բուշի մասին, որը պաշտոնավարումն ավարտելուց հետո, հիմնականում զբաղվում էր  հեծանվավազքով:

Բայց ԱՄՆ-ում  նախագահ Օբամայի կառավարության արտաքին քաղաքական հարցերը համակարգող պետքարտուղար  Ջոն Քերիից բացի, որ  հաճախ հեծանիվ էր քշում եւ  իր պատկառելի տարիքի պատճառով միջուկային թղթածրարի շուրջ Իրանի հետ ընթացող բանակցությունների ամենաթեժ ու պատասխանատու պահին  հեծանիվ քշելիս իր հավասարակշռությունը պահպանել չկարողանալով՝  վայր էր ընկել, ԱՄՆ-ում ուրիշ ոչ ոք չի տուժել:

Բնականաբար Ջոն Քերիից ու ԱՄՆ-ից բացի, այդ տրանսպորտային պատահարից տուժել էր նաեւ Իրանը, քանի որ    տեւական ժամանակ դադարեցվել էին 1+6 ձեւաչափով միջուկային բանակցությունները:

Քաղաքական գործընթացների վրա հեծանվի միակ բարեգուշակ հետեւանք թողած  դեպքն  առայժմ  կարելի է կապել Նիդերլանդների վարչապետ Մարկ Ռյուտեի անվան հետ: Նա այս տարի հուլիսի 2-ին պաշտոնն իր տեղապահին հանձնելուց հետո հեծանվով տուն է վերադարձել: 

ԳՐԻԳՈՐ ԱՌԱՔԵԼՅԱՆ