Ապրիլի 25-ին Գաֆէսճեան արվեստի կենտրոնի Հատուկ միջոցառումների սրահում տեղի ունեցավ Երեւանի Ռոմանոս Մելիքյանի անվան պետական երաժշտական քոլեջի երգչախմբի մենահամերգը (գեղարվեստական ղեկավար եւ խմբավար՝ Գրիգոր Հարությունյան, դաշնակահար՝ Լիլիթ Աբովյան): Ծրագիրն իրականացվեց Հայաստանի Կոմպոզիտորների Միության հետ համատեղ: Երեկոյի ընթացքում հնչեցին բացառապես հայ դասական եւ ժամանակակից կոմպոզիտորների խմբերգեր: Ծրագրում ընդգրկված էին Մակար Եկմալյանի, Կոմիտաս Վարդապետի ներդաշնակած Սուրբ Պատարագներից հատվածներ, ինչպես նաեւ Արամ Խաչատրյանի, Էդվարդ Միրզոյանի, Առնո Բաբաջանյանի, Թաթուլ Ալթունյանի, Խաչատուր Ավետիսյանի, Արամ Սաթյանի, Կոնստանտին Պետրոսյանի, Ավետիս Բերբերյանի, Արմեն Սմբատյանի հեղինակած խմբերգային ստեղծագործությունները: Խմբերգերից մեկը 12-րդ դարի նշանավոր եկեղեցական գործիչ, Հայոց կաթողիկոս Սուրբ Ներսես Շնորհալու հեղինակած Հարության տոնի «Նոր ծաղիկ» տաղի մշակումն էր՝ կատարված խմբավար Գրիգոր Հարությունյանի կողմից: Նշենք, որ այս խմբերգն ընդգրկված է վերջինիս՝ 2022 թվականին լույս ընծայած «Ստեղծող Մանկանց» ժողովածուում: Բացի այդ, համերգին հնչեց նաեւ Խաչատուր Ավետիսյանի «Հայոց հովիկ» ստեղծագործությունը, որը խմբերգային տարբերակով եւ ժողովրդական նվագարանների նվագակցությամբ առաջին անգամ էր ներկայացվում լսարանին: Վերջինիս փոխադրումը նույնպես կատարել էր Գրիգոր Հարությունյանը:
Սույն երգչախումբը սերտ համագործակցության մեջ է հայ ժամանակակից կոմպոզիտորների հետ: Կոմպոզիտորներից շատերն հենց այս երգչախմբային կազմի համար փոխադրում են իրենց ստեղծագործությունները: Դրա վառ օրինակը Կոնստանտին Պետրոսյանի խմբերգերից «Ազգ Հայկազյանն» է՝ գրված մեներգիչների, երգչախմբի եւ դաշնամուրի համար, որը կոմպոզիտորը հատուկ փոխադրել է այս երգչախմբային կազմի համար: Այն նույնպես հնչեց համերգի ընթացքում՝ արժանանալով ինչպես կոմպոզիտորի, այնպես էլ ներկաների բարձր գնահատանքին: Մեներգիչների երգաբաժինները կատարեցին Երեւանի Ռոմոնոս Մելիքյանի անվան պետական երաժշտական քոլեջի ուսանողներ Գայանե Հովհաննիսյանը (սոպրանո) եւ Մերի Օհանյանը (մեցցո-սոպրանո):
«Մեծ է հայ կոմպոզիտորների ավանդը հայ խմբերգային արվեստի զարգացման գործում: Մեր պարտքն ենք համարում հանրայնացնել դրանք, լայն լսարանին հասանելի դարձնել՝ զանազան բեմերից կատարելով այդ խմբերգերը: Մենք որդեգրել ենք այն սկզբունքը, որ հայ կոմպոզիտորական արվեստը պիտի լայն տարածում գտնի, եւ կարծեք առաքելություն ունենք մի մասնիկը դառնալու այդ տարածման գործին: Այս առումով հատուկ շնորհակալություն ենք հայտնում Հայաստանի Կոմպոզիտորների Միությանը՝ մշտապես մեր կողքին գտնվելու, մեր ծրագրերին սատար կանգնելու եւ մեզ ոգեշնչելու համար», – իր խոսքում նշեց Գրիգոր Հարությունյանը:
Երեկոն իրենց ներկայությամբ պատվել էին մտավորականներ, մշակութային գործիչներ, կոմպոզիտորներ, երաժշտագետներ:
Համերգի ավարտին խմբավարը շնորհակալություն հայտնեց Երեւանի Ռոմանոս Մելիքյանի անվան պետական երաժշտական քոլեջի տնօրենությանը, Հայաստանի Կոմպոզիտորների Միությանը, երգչախմբի անդամներին եւ բոլոր ներկաներին:
Թղթակից
