Քաղավիացիայի արդեն նախկին նախագահ Տաթեւիկ Ռեւազյանի հրաժարականի մասով տարբեր վարկանծներ են քննարկվում: Ըստ մամուլի հրապարակումների, նա իշխող քաղաքական թիմի՝ «Քաղաքացիական պայմանագիր» կուսակցության քաղաքականության ու ընդդիմադիր գործիչների նկատմամբ ոստիկանության կիրառած բռնի գորոծողությունների հետ է անհամաձայն եղել: Մեկ այլ վարկածով՝ Ռեւազյանն առաջիկայում պաշտոնի կանցնի, այսպես կոչված, «ազգային» ավիափոխադրող ընկերությունում՝ «Էյր Առնա»-ում:
Հարց կառաջանա, թե «ազգյաինն» ինչո՞ւ ենք չակարտներում գրում, չէ՞ որ ըստ կառավարության՝ այն ազգային ավիափոխադրող է, ինչի մասին հրաժեշտի իր տեքստում նաեւ Ռեւազյանն է գրել: Պատասխանն առավել քան պարզ է՝ բացի ավիափոխադրողի՝ Հայաստանին ու հայերին վերաբերող անվանման, ընկերության որեւէ այլ բան հայկական չէ. ո՛չ տնօրեններն են հայեր, ո՛չ լեզուն է հայերենը եւ ոչ… Թեեւ Ռեւազյանը «էյր Առնայի» ստեղծումն ու հայկական օդային ուղիներն արաբներին տրամադրելը պատմական մեծ իրադարձություն է համարում, բայց ազգային ավիաուղին օտարին հանձնելը բնավ դրվատելի ձեռքբերում չէ:
Էդմոն Մարուքյանի ասած «սիրունիկ աղջիկը» հրաժեշտի սիրունիկ տեքստ էր հրապարակել, որտեղ կենացային տրամադրությամբ օդային ուղիների անվտանգության, ոլորտի բարեփոխումների մասին էր խոսում: Զավեշտն այն է, որ դրանք ո՛չ տեսել ենք, ո՛չ՝ լսել:
Եվրոպաներում կրթություն ստացած Ռեւազյանը, որ, իսկապես, թվում էր, ոլորտը զարգացնելու է ձեռք բերած գիտելիքների, հմտությունների ու եվրոպական ծանոթությունների հաշվին, բացի «վոյաժներն» ու պաշտոնավարման ընթացքում «երկու երախա» ունենալը (Աստված պահի նրանց) որեւէ այլ ձեռքբերում չի ունեցել: Ի դեպ, մանակահասակ երեխային գիրկն առած միջոցառումների գնալը վաղուց արդեն կիրառված ու ոչ այդքան ընդունելի PR տեխնոլոգիա է, հետեւաբար տիկին «բազմազբաղ» նախկին նախագահին այդ տեսարանից հրաժարվելու խորհուրդ ենք տալիս:
Միայն մեկ տարվա ընթացքում՝ 2018-2019-ին, նա շրջագայել է 11 երկրի 13 քաղաքով, ինչի համար պետբյուջեից շուրջ 18 մլն դրամ է տրամադրվել, ավելի քան 12 մլն դրամն ավիատոմսերի, ավելի քան 5.5 մլն դրամ՝ օրապահիկի ու գիշերավարձի համար: «Ես սիրում եմ ճանապարհորդել, եթե կոնկրետ արդյունքներ կարամ բերեմ»,- նմանօրինակ հաշվարկներին ի պատասխան՝ ասում էր Ռեւազյանը: Փաստն այն է, որ նրա «վոյաժները» Քաղավիացիայի ոլորտին ոչինչ էլ չեն բերել՝ ո՛չ նոր ուղիների ու մինչեւ այժմ չեղած չվերթների բացման, ո՛չ էլ նկատելի ներդրումների ականատեսն ենք եղել: Երկքաղաքացի «սիրուն աղջիկը», որ նախընտրել է իր երկու զավակներին դրսում՝ Դանիայում ունենալ (մտածելով նրանց քաղաքացիության մասին) ու անգամ հայերենին նորմալ չէր տիրապետում, Եվրոպայից Հայաստան, փաստորեն, «խոպան» էր եկել. եկավ, տեսավ, վայելեց:
ՍԵՎԱԿ ՎԱՐԴՈՒՄՅԱՆ
